Jak u Francyi sprabujuć abmiežavać dostup niepaŭnaletnich da parnahrafii
Jak piša Le Monde, žadańnie ŭrada Francyi, jak i inšych krain, prymusić płatformy z parnahrafičnym źmiestam praviarać uzrost svaich naviedvalnikaŭ ciažka realizavać, bo dahetul niama efiektyŭnaha techničnaha rašeńnia.
Fota: vecteezy / andrewangelo
Francuzski ŭrad choča abmiežavać dostup da sajtaŭ dla darosłych, kab abaranić dziaciej ad niepažadanaha kantentu. Dla hetaha jon patrabuje ad takich internet-płatformaŭ uvieści sistemu pravierki ŭzrostu. Kali sajty nie zrobiać hetaha, jany mohuć być zabłakavanyja sudom ci rehulataram.
Ale, jak adznačaje Le Monde, palityčnaja vola ŭpirajecca ŭ ścianu techničnych prablem.
Z tym samym sutyknulisia ŭ Vialikabrytanii, dzie niekalki ŭradaŭ pačynajučy z 2017 hoda sprabavali realizavać padobnuju ideju. Niahledziačy na poŭny palityčny kansensus u dačynieńni da ŭviadzieńnia błakavańnia parnahrafičnych sajtaŭ dla niepaŭnaletnich, prajekt abmiarkoŭvaŭsia čatyry hady, i hetaje abmierkavańnie ničym nie skončyłasia.
Z tym samym sutyknułasia i Hiermanija.
Sapraŭdy, jak vyznačyć uzrost internet-karystalnikaŭ i pry hetym nie parušyć ich ananimnaść?
Jak piša Le Monde, vyznačyć uzrost bieź identyfikacyi asoby niemahčyma. Karystalniki nie buduć pakazvać pornasajtam kopiju pašparta.
Adzinaje rašeńnie — pracedura «dvajnoj ananimnaści», u jakoj udzielničaje «davieranaja asoba», jakaja praviaraje, što čałaviek sapraŭdy paŭnaletni, i pieradaje hetuju infarmacyju pornasajtu, naprykład, z dapamohaj koda, nie raskryvajučy jaho asobu.
Žurnalisty zhadvajuć, što ŭ Vialikabrytanii było razhledžana paŭtuzina takich rašeńniaŭ. Adzin z prajektaŭ płanavaŭ prodaž «kodaŭ dostupu», jakija paćviardžajuć paŭnalećcie asoby, u kramach abo ŭ prahramie, što skanuje vaš tvar, kab vyznačyć, niepaŭnaletni vy ci darosły.
Adzin z samych paśpiachovych instrumientaŭ navat prapanavała chołdynhavaja kampanija MindGeek, jakaja kiruje mnohimi papularnymi biaspłatnymi parnahrafičnymi veb-sajtami, a taksama kampanijami pa vytvorčaści parnahrafičnych filmaŭ.
Vydańnie cytuje spravazdaču Centra ličbavaj ekśpiertyzy pry ŭradzie Francyi:
«Z praviedzienaha analizu roznych isnych mietadaŭ pravierki vynikaje, što nivodny ź ich nie moža ličycca adnačasova efiektyŭnym, całkam prazrystym dla karystalnika, mieć małuju stupień umiašalnictva ŭ pryvatnaść i być dastupnym dla ŭsich, choć niekatoryja zdajucca lepšymi za inšyja».
Śpiecyjalisty pa hetym pytańni taksama adznačajuć, jak piša Le Monde, što mahčymaje filtravańnie pornasajtaŭ budzie lohka abyści. U niekalki klikaŭ virtualnaja pryvatnaja sietka (VPN) dazvalaje padklučacca da internetu ź inšaj krainy i takim čynam paźbiehnuć błakavańnia.
Žurnalisty zaŭvažajuć, što heta nahadvaje situacyju z francuzskim zakonam Hadopi (2009 hoda), jaki pavinien byŭ zmahacca ź nielehalnymi spampoŭkami muzyki i filmaŭ, ale akazaŭsia nieefiektyŭnym, tamu što internet-karystalniki znajšli inšyja sposaby atrymlivać kantent biez apłaty.
Pirackija instrumienty dla spampoŭki, jakija pieravažali ŭ toj čas i dobra paddavalisia kantrolu, zamianili novymi servisami, jakija stała składaniej kantralavać. U toj ža čas źnižeńnie piractva źviazvajuć najpierš z raźvićciom takich niedarahich płatformaŭ, jak Spotify, Deezer ci Netflix.
Jak piša «Mond», prablema nie tolki ŭ parnahrafii.
Žurnalisty nahadvajuć, što ŭ Francyi, jak i ŭ Vialikabrytanii, rehularna viartajucca da inšaj idei: raspracoŭščyki abaronienych miesiendžaraŭ pavinny davać svaim karystalnikam zašyfravanyja kanały kamunikacyi, ale pry patrebie dazvalać dostup da źmiestu paviedamleńniaŭ dziaržaŭnym orhanam (u vypadku baraćby z teraryzmam, kibiermachlarstvam, piedafilijaj i h.d.).
Hetaje patrabavańnie ŭtrymlivajecca ŭ novym anhlijskim zakonaprajekcie ab biaśpiecy ŭ internecie, jaki skiravany na procidziejańnie raspaŭsiudu dziciačaj parnahrafii.
«Ludzi, jakija stajać za hetym zakonaprajektam, kažuć, što pryznajuć važnaść šyfravańnia i kanfidencyjnaści, ale pierakonvajuć, što možna adsočvać paviedamleńni biez škody dla skraznoha šyfravańnia. Miž tym heta niemahčyma»,
— cytuje francuzskaje vydańnie adkryty list kiraŭnikoŭ WhatsApp (hrupa Meta).
Le Monde źviartaje ŭvahu na toje, što akramia techničnych ciažkaściaŭ, takija zakonaprajekty nie mohuć być efiektyŭna vykarystanyja, bo sutykajucca z palityčnymi pieraškodami. Bolšaść karystalnikaŭ pornasajtaŭ — darosłyja, adpaviedna, jany hałasujuć i nie padtrymlivajuć praźmiernych abmiežavańniaŭ.
Čytajcie jašče:
Netflix testuje hulni na televizary, jakija mohuć vykarystoŭvać telefony ŭ jakaści kantroleraŭ
Porna ŭ roznych krainach Jeŭropy: u čym adroźnieńnie
Što parnahrafija robić ź dziciačym mozham i jak zrabić, kab jana nie traplała da padletkaŭ
