U ŚMI paviedamili pra vizit «kadyraŭcaŭ» u Hruziju
Hruzinski apazicyjny telekanał «Mtavary» apublikavaŭ videakadry kartežu mašyn z rasijskimi numarami, jaki zaŭvažyli na aŭtamahistrali pablizu vioski Natachtary. Paźniej u sacsietkach apublikavali fatahrafiju tych samych mašyn, zroblenuju ŭ Batumi.
Karystalniki sacsietak pišuć pra vizit u Hruziju «kadyraŭcaŭ». Paviedamlajuć, što aŭtamabil z takimi ž numarami možna zaŭvažyć u starym instahram-dopisie biznesoŭca Asłanbieka Achmietchanava, piša «Recha Kaŭkaza».
Achmietchanaŭ — uładalnik kampanii «Poŭdzień-nafta». U 2020 hodzie jaho asudzili da hoda ŭmoŭna za niezakonnuju bankaŭskuju dziejnaść. Krynicy paćvierdzili suviaź Achmietchanava sa złačynnym śvietam. Paviedamlali, što jon čačenski aŭtarytet pa mianušcy Čort.
U krasaviku 2020 hoda kiraŭnik Čačni Ramzan Kadyraŭ, muftyj i vysokapastaŭlenyja čynoŭniki respubliki pryjechali da Asłanbieka Achmietchanava i adčytali jaho za raśpićcio śpirtnoha ŭ kampanii žančyn. Achmietchanaŭ paprasiŭ prabačeńnia ŭ efiry dziaržaŭnaj telekampanii.
U časie razmovy z Achmietchanavym Kadyraŭ zapatrabavaŭ ad biznesoŭca raspavieści pra kuplu niejkaj zbroi. Taksama Kadyraŭ nahadaŭ, jak syn Achmietchanava ŭčyniŭ bojku padčas pieršynstva Rasii pa volnaj baraćbie.
Pakul nieviadoma, ci naviedaŭ Hruziju sam Achmietchanaŭ. Hruzinskija ŭłady infarmacyju, jakaja abmiarkoŭvajecca ŭ sacsietkach i ŚMI, pakul nie kamientavali.
Pavodle infarmacyi «Mtavary», «kadyraŭcy» znachodzilisia ŭ Hruzii ciaham niekalkich dzion i ŭžo pakinuli krainu praz hruzina-tureckuju miažu.
Jak piša sajt «Kavkaz.Riealii», pra mahčymuju pajezdku akružeńnia Ramzana Kadyrava ŭ Turcyju taksama 31 maja zajavili ŭ čačenskich apazicyjnych telehram-kanałach. Praź dzień kamandzir pałka palicyi imia Achmata Kadyrava Zamid Čałajeŭ apublikavaŭ skrynšot paznačanaha na karcie hatela Concorde De Luxe Resort u tureckaj Antalji, jak miarkujecca, namiakajučy na svaju prysutnaść tam.
