Šaŭčenka: Kreml chacieŭ by zamianić Łukašenku, i ja viedaju na kaho
Narodny deputat Ukrainy Jaŭhien Šaŭčenka, jaki maje suviazi z vyšejšym kiraŭnictvam Biełarusi, raskazaŭ, čamu Łukašenka niazručny Pucinu i jakuju dla jaho zamienu znajšli ŭ Maskvie.
Narodny deputat Ukrainy Jaŭhien Šaŭčenka padčas intervju. Stop-kadr videa
U intervju jutub-kanału «Fabrika novin» narodny deputat Ukrainy Jaŭhien Šaŭčenka vykazaŭ dumku, što Maskva zacikaŭlenaja ŭ tym, kab Łukašenka nie byŭ na čale Biełarusi. Akramia hetaha, jon vykazaŭsia ab tym, što viedaje ab płanach Kramla zamianić Łukašenku na inšaha čałavieka.
«Na kaho dakładna, ja nie budu ciapier nazyvać. Ale heta bahaty čałaviek, biznesmien. Jon rodam ź Biełarusi. Hety čałaviek vykonvaŭ by ŭsie kapryzy Pucina pa pieršaj kamandzie».
Šaŭčenka adznačyŭ, što dla Pucina Łukašenka — nie vielmi zručnaja fihura, bo nie budzie prosta tak vykonvać niejkija zahady. Deputat ličyć, što nie treba surjozna ŭsprymać i zajavy Łukašenki adnosna vajny z Ukrainaj i jaho dačynieńnie da jaje pačatku.
«Usie jaho dziejańni, kali praanalizavać łahična, a nie praz emocyi, navat kali jon Pucinu kazaŭ: «Pravilna, što napali. Jany b napali na nas. Heta previentyŭnyja miery». Hetyja słovy śviedčać tolki ab tym, što jon nie byŭ dałučany da hetaha pracesu. I hety jaho zvanok a 5-j ranku Pucinu. Kali ty «ŭ temie» ź imi, čamu ty jamu zvoniš a piataj ranku?
Ja viedaju psichatyp Łukašenki i ŭpeŭnieny, što jon nie byŭ dałučany da hetaj temy naŭprost. Jaho vykarystali».
Na pytańnie, jak mahło tak stacca, što ŭvarvańnie adbyłosia i z terytoryi Biełarusi bieź viedama Łukašenki, narodny deputat adkazaŭ:
«Vy ž pamiatajecie, što ŭ toj čas hulali ŭ vajennyja vučeńni, haniali tudy-siudy vojski. A potym Łukašenka apraŭdvaŭsia: «Ja svoj, ja z vami». Mahčyma, jon dumaŭ, što atrymajecca za try dni, i tady jany buduć razam dzialić achviaru».
A zajava Łukašenki «Ja vam pakažu, adkul rychtavałasia napadzieńnie», na dumku Šaŭčenki, adrasavałasia Pucinu. Takim čynam jon siabie i prajaviŭ. Jon raić poŭnaściu pahladzieć zapis, dzie hučać hetyja słovy. Tady možna ŭbačyć, što ŭ kancy Łukašenka havoryć «I pravilna zrabili. Kab vy hetaha nie zrabili, na nas by napali». «Takim čynam, jon padyhryvaŭ», — ličyć palityk.
Kali viadoŭca nahadaŭ słovy Łukašenki ŭ intervju Sałaŭjovu za niekalki dzion da pačatku vajny: «Z kim tam vajavać. Na čatyry dni. Tam vajavać niama z kim», to Šaŭčenka adkazaŭ:
«Davajcie budziem ščyrymi. U nas šmat chto va Ukrainie z kompleksam zanižanaj samaacenki ličyŭ, što naša armija słabaja. A ja zaŭsiody kazaŭ, što ŭkraincy zaŭsiody, navat u saviecki čas, byli najlepšymi vajskoŭcami. Heta pryrodnaje. Ja zaŭsiody kazaŭ, što Biełaruś nie pra vajnu.
A ŭkraincy — narod, jaki ŭmieje vajavać. I svajoj historyjaj jon heta paćvierdziŭ. Heta vajaŭničy narod, i ź im vajavać niavarta. Heta była pamyłka rasijan. Na žal, palityčnaje kiraŭnictva Kramla i ciapier hetaha nie zrazumieła. Jany nie razumiejuć, što vajujuć nie ź Zialenskim ci z Budanavym. Jany vajujuć z ukrainskim narodam. A narod pieramahčy niemahčyma».
Raniej kiraŭnik ukrainskaj vajskovaj vyviedki Kiryła Budanaŭ zajaviŭ, što jany vykarystoŭvali Jaŭhiena Šaŭčenku dla kamunikacyi z Alaksandram Łukašenkam.
Čytajcie jašče:
