Z-za nielehałaŭ ź Biełarusi źbirajucca ŭvieści pamiežny kantrol na miažy Hiermanii z Polščaj
Rost nielehałaŭ, jakija traplajuć u Hiermaniju ź Biełarusi, vyklikaje zakłapočanaść va ŭradaŭ fiederalnych ziamiel, jakija miažujuć z Polščaj.
Zdymak nosić ilustracyjny charaktar. Fota: bundespolizei.de
Jak paviedamlaje internet-vydańnie Welt sa spasyłkaj na atrymanyja ad fiederalnaj palicyi źviestki, na ŭčastku miažy Hiermanii z Polščaj u krasaviku kolkaść vyjaŭlenych nielehalnych ujezdaŭ vyrasła amal udvaja. Pakazčyk skłaŭ 2427 vypadkaŭ u paraŭnańni z 1584 u sakaviku. U zimovyja miesiacy ich było značna mienš — 1389 u studzieni i 1040 u lutym.
U artykule cytujecca paviedamleńnie polskich uład:
«Usio čaściej my nazirajem ahresiŭnyja pavodziny zamiežnikaŭ, jakija napadajuć na pamiežnikaŭ, tamu što chočuć luboj canoj dabracca da punkta pryznačeńnia — praz Polšču ŭ Zachodniuju Jeŭropu». Rašučaść mihrantaŭ raście i «bazujecca nie na žadańni atrymać abaronu ŭ Polščy, a na tym, kab jak maha chutčej trapić u Zachodniuju Jeŭropu».
Pry hetym biełaruskija vajskoŭcy «pastajanna sadziejničajuć niezakonnamu pierasiačeńniu miažy i zabiaśpiečvajuć najaŭnaść pryład dla jaje pierasiačeńnia». Pavodle pamiežnaj palicyi Polščy, siarod zatrymanych šmat siryjcaŭ i afhancaŭ, a taksama hramadzian inšych arabskich i afrykanskich krain. Mnohija z zatrymanych majuć rasijskija turystyčnyja abo inšyja vizy.
Aŭtar zhadvaje, što inšaje niamieckaje vydańnie Bild sa spasyłkaj na kanfidencyjny dakumient fiederalnaj palicyi paviedamiła, što ŭ pałovy aryštavanych na ŭschodniaj miažy Hiermanii ŭ sakaviku byli znojdzieny dokazy taho, što jany patrapili ŭ ES praź Biełaruś.
«Niepravamiernaje vykarystańnie rasijskich viz dla pajezdak praz Rasijskuju Fiederacyju ŭ Biełaruś i dalej u ES zastajecca niaźmiennym», — havorycca ŭ dakumiencie. U sacsietkach praciahvajuć rekłamavać maršrut praz Rasijskuju Fiederacyju i Biełaruś.
Vydańnie sa spasyłkaj na fiederalnuju palicyju źviartaje ŭvahu, što ŭ krasaviku na polskim učastku miažy było vyjaŭlena značna bolš niesankcyjanavanych ujezdaŭ, čym na aŭstryjskim (1298). Heta tłumačycca tym, što miaža z Aŭstryjaj kantralujecca bolš stroha, čym inšyja, z-za stacyjanarnaha pamiežnaha kantrolu, jaki ŭ Hiermanii isnuje tolki tam.
Aŭtar artykuła nahadvaje, što na samicie pa prablemach biežancaŭ, jaki adbyŭsia 10 maja 2023 hoda, kancler Ołaf Šolc i kiraŭniki ŭradaŭ 16-ci fiederalnych ziamiel damovilisia pašyryć stacyjanarny pamiežny kantrol. U dakumiencie adznačałasia:
«U zaležnaści ad situacyi fiederalny ŭrad taksama ŭviadzie kancepcyju pamiežnaj biaśpieki, jakaja isnuje ŭ dačynieńni da Aŭstryi, na inšych unutranych miežach Hiermanii paśla kansultacyj z adpaviednymi fiederalnymi ziemlami Fiederatyŭnaj Respubliki Hiermanija».
U artykule adznačajecca, što ciapier ministry ŭnutranych spraŭ Brandenburha i Saksonii, jakija miažujuć z Polščaj, patrabujuć ad fiederalnaha ministra ŭnutranych spraŭ nieadkładna ŭvieści stacyjanarny kantrol na miažy z Polščaj.
Aŭtar zaŭvažaje, što mahčymaść admovy va ŭjeździe ŭ Hiermaniju moža być realizavanaja tolki paśla paviedamleńnia ab hetym u adpaviednyja ŭstanovy ES z paznačeńniem pryčyny, čamu ŭvodzicca takaja strohaja miera pamiežnaha kantrolu na ŭnutranych miežach krain — členaŭ Šenhienskaj prastory. U inšym vypadku pamiežny kantrol budzie nie bolš čym statystyčnym ulikam niezakonnych pierasiačeńniaŭ miažy.
Aŭtar adznačaje, što čakać surjoznaha supracivu z boku Brusiela nie treba, bo Francyja 1 maja abviaściła ab uviadzieńni stacyjanarnaha kantrolu na ŭsich dziaržaŭnych miežach.
Čytajcie jašče:
Biełarusa zatrymali na niamiecka-polskaj miažy za dapamohu nielehalnym mihrantam
Litva paprasiła ŭ Jeŭrasajuza dadatkovyja srodki dla ŭmacavańnia miažy ź Biełaruśsiu
Adnovicca avijazłučeńnie ź Iranam. Ci ryzyknie Łukašenka paŭtaryć ataku mihrantami?
