Trybunał dla Łukašenki i dapamohu biełaruskim vymušanym emihrantam abmiarkoŭvała Cichanoŭskaja ŭ Rejkjaviku
Lidarka demakratyčnych sił Śviatłana Cichanoŭskaja biare ŭdzieł u samicie Rady Jeŭropy, jaki prachodzić u Rejkjaviku. Tam prysutničajuć kiraŭniki 46 krain.
Śviatłana Cichanoŭskaja sustrełasia z prezidentam Parłamienckaj Asamblei Rady Jeŭropy Cini Koksam. Fota: Ofis Cichanoŭskaj
Śviatłana Cichanoŭskaja ŭčora sustrełasia z prezidentam Parłamienckaj Asamblei Rady Jeŭropy Cini Koksam. Jon zaprasiŭ Cichanoŭskuju vystupić na plenarnaj siesii PARIE ŭ červieni, dzie budzie ahučany dakład pa situacyi ź biełaruskimi ŭciekačami, paviedamlaje Ofis Cichanoŭskaj. Dakład rychtavaŭsia luksiemburhskim pradstaŭnikom PARIE z udziełam demakratyčnych sił Biełarusi.
U dakumiencie havorycca, što ad 200 tysiač da 500 tysiač čałaviek vyjechali ź Biełarusi paśla 2020 hoda i padviarhajucca roznaha kštałtu abmiežavańniam.
U dakładzie dajucca praktyčnyja rekamiendacyi, jakim čynam dapamahčy biełarusam, što apynulisia ŭ vymušanaj emihracyi. Jaho prezientacyja pavinna źmianić staŭleńnie da biełarusaŭ u vyhnańni z boku zamiežnych krain, spadziajucca ŭ štabie Cichanoŭskaj.
Taksama Śviatłana Cichanoŭskaja i Cini Koks abmierkavali situacyju z masavym prymusovym vyvazam ukrainskich dziaciej z akupavanych terytoryj nie tolki ŭ Rasiju, ale i ŭ Biełaruś, datyčnaść da hetaha Łukašenki. Damovilisia, kab hetaje pytańnie było ŭźniata na najbližejšych sustrečach na siesijach PARIE i było ŭklučana ŭ dakład pa Ukrainie. Heta dazvolić pryciahnuć režym Łukašenki da adkaznaści ŭ mižnarodnych sudach, miarkujuć u štabie.
Miechanizmy stvareńnia trybunała taksama byli temaju abmierkavańnia. Łukašenka ź jaho paplečnikami mohuć panieści adkaznaść za parušeńni pravoŭ čałavieka, złačynstvy suprać čałaviečnaści, za saŭdzieł u vajnie, paviedamlaje štab Cichanoŭskaj.
Razam z prezidentam PARIE Cichanoŭskaja abmierkavała taksama kroki, jakija treba rabić dla ŭstupleńnia Biełarusi ŭ Radu Jeŭropy.
«Supraca z PARIE, z Radaj Jeŭropy maje vielmi važnaje značeńnie dla Biełarusi, — skazała Cichanoŭskaja. — Bo heta ŭ tym liku dazvalaje źmianšać zaležnaść Biełarusi ad Rasii, daje demakratyčnaj Biełarusi suvierenitet i takim čynam abaraniaje krainu ad pahłynańnia Rasijaj. Vielmi važna, kab Rada Jeŭropy zajmała praaktyŭnuju pazicyju da biełarusaŭ».
Była dasiahnutaja damova ab tym, što pradstaŭniki biełaruskaj hramadzianskaj supolnaści, partyj buduć udzielničać u pasiadžeńniach PARIE z pravam naziralnikaŭ. Zadača — kab jak maha bolš roznych palityčnych sił mieła mahčymaść pradstavić biełaruskuju pazicyju ŭ Radzie Jeŭropy, kab tam hučaŭ hołas biełarusaŭ, a nie režymu, adznačajuć u štabie Cichanoŭskaj.
