Biełarusam zakryvajuć rachunki ŭ češskich bankach
U Čechii adbyvajecca nieabjaŭlenaje anulavańnie bankaŭskich rachunkaŭ biełarusaŭ i rasijan, jakija znachodziacca ŭ Čechii pa pracoŭnaj abo studenckaj vizie. Banki ličać, što dziejničajuć u adpaviednaści z zakanadaŭstvam i rasceńvajuć hetych hramadzian jak «vysokaryzykoŭnych», piša češskaje vydańnie Je15.
Zdymak ilustracyjny. Fota: UniCredit Bank
Banki Creditas i UniCredit Bank paćvierdzili anulavańnie rachunkaŭ hramadzian Rasii i Biełarusi. Jašče adzin bank, ČSOB, admaŭlaje takuju praktyku, ale češskaje vydańnie śćviardžaje, što padobnyja vypadki ŭ jaho praktycy taksama jość.
«UniCredit Bank prajaŭlaje vysokuju aściarožnaść u dačynieńni da asob z krain, jakija ŭpraŭleńnie finansavaha analizu (FAÚ) zaličvaje da krain z vysokim uzroŭniem ryzyki. Adnak bank dziejničaje nie ŭsiebakova, a zaŭsiody zychodziačy z acenki kankretnaj situacyi i ryzyk, jakija hety klijent pradstaŭlaje dla banka. Heta aznačaje, što ŭ vypadku anulavańnia rachunku, nieabchodna było vyznačyć peŭnuju ryzyku dla banka», — raskazali ŭ UniCredit Bank.
Pradstaŭnik Fio Bank adznačyŭ, što kali bank vyrašaje zakryć rachunak klijenta luboj nacyjanalnaści, jon nie robić hetaha biez papiaredžańnia: «U klijenta jość standartny dvuchmiesiačny termin paviedamleńnia, i infarmacyja adpraŭlajecca jamu pa pošcie. Bank taksama praviaraje dziejnyja sankcyjnyja śpisy na pradmiet zapytaŭ ad hramadzian Rasii ci Biełarusi».
Raniej urad Čechii praciahnuŭ da 31 sakavika 2024 hoda zabaronu na vydaču viz i DNŽ hramadzianam Biełarusi i Rasii, uviedzienuju praz vajnu va Ukrainie. Akramia taho, pad abmiežavańnie ciapier trapiać biełarusy i rasijanie z pašpartami inšych krain.
Čytajcie taksama:
