Dziorzkaje rabavańnie ŭ Drezdenie: piać čałaviek pryznanyja vinavatymi ŭ kradziažy kaštoŭnaściaŭ na 100 miljonaŭ jeŭra
Sud u Niamieččynie pryznaŭ piaciarych čałaviek vinavatymi ŭ dziorzkim rabavańni, ździejśnienym u Drezdenie ŭ 2019 hodzie.
Muziej Gruenes-gewoelbe. Fota: Gruenes-gewoelbe.skd.museum
Tady banda ŭvarvałasia ŭ haradski muziej Drezdena i vyniesła adtul redkija kaštoŭnaści, jakija zachoŭvalisia ŭ im, na 113 miljonaŭ jeŭra.
Palicyi ŭdałosia znajści bolšuju častku vykradzienaha, uklučajučy inkrustavany dyjamientami mieč. Jość aściarohi, što astatniaja častka vykradzienaha moža być stračanaja nazaŭždy.
Usim abvinavačanym, jakija ŭvachodziać u znakamituju ŭ Niamieččynie siamiejnuju kryminalnuju sietku, pahražaje ad čatyroch da šaści hadoŭ turmy, piša Bi-bi-si.
Paśla rasśledavańnia, jakoje doŭžyłasia ceły hod, palicyja zrabiła pieršyja aryšty. Usie padsudnyja — členy tak zvanaha «kłana Remo». U Niamieččynie isnuje niekalki «kłanaŭ» — siamiejnych sietak z arabskimi karaniami, adkaznych za bujnyja arhanizavanyja złačynstvy, u tym liku za nalot na ŭniviermah i rabavańnie banka.
Adzin z drezdenskich rabaŭnikoŭ raniej byŭ asudžany za kradziež hihanckaj załatoj maniety vahoj 100 kh ź Bierlinskaha muzieja Bode ŭ 2017 hodzie. Manieta tak i nie była znojdziena i, jak miarkujuć, jaje pierapłavili na mietał.
«Jość ludzi, jakija kraduć tvory mastactva z pavahi da mastactva, ale ŭ hetym vypadku ŭsio było naadvarot, — kaža Maryjon Akierman, hienieralny dyrektar Drezdenskich dziaržaŭnych mastackich kalekcyj. — Jany nie mieli ni najmienšaha ŭjaŭleńnia, što jany vykrali».
Drezdenskuju skarbnicu Grünes Gewölbe («Zialonyja sklapieńni»), dzie zachoŭvajecca samaja vialikaja ŭ Jeŭropie kalekcyja juvielirnych vyrabaŭ i kaštoŭnaściaŭ, abrabavali ŭ 2019 hodzie. Heta było najbujniejšaje rabavańnie juvielirnych schoviščaŭ u sučasnaj historyi.
Ekśpierty vykazvali aściarohi, što, padobna załatoj maniecie, skradzienyja kaštoŭnaści stračanyja nazaŭždy.
Adnak troje aryštavanych pryznalisia ŭ kradziažy i pahadzilisia abviaścić miescaznachodžańnie narabavanaha ŭ abmien na bolš miakkija prysudy ŭ ramkach uhody z prakurorami.
U ahulnaj składanaści na svajo miesca ŭ muziei viarnuŭsia 31 pradmiet, adnak niekatoryja kaštoŭnaści pa-raniejšamu ličacca źnikłymi, uklučajučy vielmi redki ałmaz pad nazvaj «Bieły kamień Saksonii».
Heta było staranna spłanavanaje rabavańnie.
Rabaŭniki niekalki razoŭ naviedvali budučaje miesca złačynstva i zahadzia padrychtavali miesca, kab prakraścisia ŭnutr, raśpiłavaŭšy hidraŭličnym razakom pruty akonnaj rašotki, a zatym zakleiŭšy ich skotčam.
Kala 5 ranicy 25 listapada 2019 hoda złamyśniki padpalili enierhapadstancyju, kab časova pakinuć muziej biez elektryčnaści i adklučyć sihnalizacyju, adahnuli kraty na aknie pieršaha paviercha i pranikli ŭnutr.
Na zapisie z kamiery videanazirańnia vidać, jak dvoje mužčyn praciskajucca ŭ vuzkuju adtulinu, zatym adzin ź ich uvachodzić u vystavačnuju zału ź siakierkaj.
Palicyja była na miescy ŭžo praź piać chvilin, ale rabaŭniki paśpieli schavacca, zachapiŭšy try nabory juvielirnych vyrabaŭ z dyjamientami, sapfirami, smarahdami i rubinami. U kožnym z naboraŭ było pa 37 pradmietaŭ.
Siarod vykradzienaha była špaha z efiesam, inkrustavanym dzieviaćciu bujnymi i 770 drobnymi dyjamientami, i aksielbant, upryhožany 49-karatnym biełym dyjamientam.
Inšy znakamity ekspanat, jaki zachoŭvaŭsia ŭ tym ža pamiaškańni, 41-karatny «Drezdenski zialony bryljant», u paradku muziejnaha abmienu znachodziŭsia na ekspazicyi ŭ ńju-jorkskim muziei Mietrapaliten.
Presa tady pisała, što vykradzienyja šedeŭry nastolki viadomyja, što pradać ich niemahčyma.
Ułady abiacali ŭznaharodu ŭ 500 tysiač jeŭra za infarmacyju pra złačyncaŭ i miescaznachodžańnie skarbaŭ. Ci była jana kamu-niebudź vypłačanaja, nieviadoma.
Dziorzkaść rabavańnia ŭzrušyła śviet mastactva. Ale ŭzłom taksama padniaŭ pytańni ab adekvatnaści mier biaśpieki muzieja.
Navat adzin sa złodziejaŭ padčas sudovaha razboru vykazaŭ ździŭleńnie tym, što im udałosia pierapiłavać akonnyja rašotki, nikoha nie patryvožyŭšy, niahledziačy na šum.
Čytajcie taksama:
U Drezdenie abrabavali viadomy muziej: straty mohuć skłaści 1 miljard jeŭra
