Pryhožynu nie pahražaje adchileńnie, pakul «Vahnier» na pieradavoj — ISW
Sproby zasnavalnika PVK «Vahnier» Jaŭhiena Pryhožyna supracoŭničać z ukrainskaj raźviedkaj, pra što paviedamiła hazieta Washington Post, byli, vierahodniej za ŭsio, elemientam jaho kanfliktu ź Minabarony RF, a nie atakaj na prezidenta Uładzimira Pucina, miarkujuć analityki Instytuta vyvučeńnia vajny.
Jaŭhien Pryhožyn. Fota: Topcor.ru
U ISW nahadali, što, pavodle jahonych acenak ad 12 maja, Pryhožyn kankuruje z rasijskim Minabarony za dobrazyčlivaść Pucina, choć i pry hetym zmoh niespadziavana zaniepakoić rasijskaha prezidenta svaimi vajskova-palityčnymi ambicyjami.
U Instytucie ličać, što patencyjnyja kantakty Pryhožyna z Hałoŭnym upraŭleńniem raźviedki Ukrainy naŭrad ci zaachvociać Kreml da jaho likvidacyi ŭ bližejšaj pierśpiektyvie.
«Kantakty Pryhožyna z ukrainskaj raźviedkaj, vierahodna, byli častkaj namahańniaŭ, nakiravanych na toje, kab zavajavać prychilnaść Pucina dziakujučy chutkaj pieramozie «Vahniera» ŭ Bachmucie i nanieści škodu rasijskim rehularnym vojskam na fonie zakulisnaha supraćstajańnia ź imi.
Pryhožyn niadaŭna admoviŭsia ad svaich kamientaryjaŭ ad 9 maja, jakija ŭskosna vyśmiejvali Pucina, što jašče raz śviedčyć pra toje, što jon uśviedamlaje svaju zaležnaść ad Pucina i nie maje namieru supraćstajać jamu.
Hetyja abvinavačvańni (u kantaktach z HUR) naŭrad ci prymusiać Kreml adchilić Pryhožyna ŭ bližejšaj pierśpiektyvie, ale mohuć spryjać namahańniam pa jaho dyskredytacyi. Kreml, vierahodna, padazraje abo viedaje pra suviazi Pryhožyna z ukrainskaj raźviedkaj i, vierahodna, nie byŭ zaśpiety źnianacku paviedamleńniem WP i ŭciečkaj dakumientaŭ amierykanskaj raźviedki».
Čytajcie taksama:
Pryhožyn nazvaŭ adstupleńnie rasijskich vojskaŭ na poŭnač ad Bachmuta ŭciokami