Na «prafiłaktyčnyja hutarki» ciapier vyklikajuć i ŭ rajvykankamy
Daŭno viadoma, što «niadobranadziejnych» u palityčnym sensie biełarusaŭ pieryjadyčna vyklikajuć u prakuraturu, Śledčy kamitet abo RAUS. Padčas tak zvanych «prafiłaktyčnych hutarak» ludziam nahadvajuć pra ich «praviny» i dajuć padpisać papieru z aficyjnym papiaredžańniem. Ale ź niadaŭniaha času «na prafiłaktyku» pačali vyklikać i ŭ rajvykankamy, piša «Viciebskaja viasna».
Budynak Kastryčnickaha rajvykankama ŭ Viciebsku. Fota: vitebsk.gov.by
U Viciebsku ŭ rajvykankamach, pavodle pravaabaroncaŭ, stvaryli admysłovyja hrupy ź ideałahičnych rabotnikaŭ «u miežach baraćby z teraryzmam i ekstremizmam».
Adna z takich hrup dziejničaje ŭ vykankamie Kastryčnickaha rajona, i pra vizit tudy na ŭmovach ananimnaści pravaabaroncam raskazaŭ adzin z asudžanych za padpiski na tak zvanyja «ekstremisckija internet-resursy».
Pozvu na hutarku jamu pad podpis uručyła paštaljonka. U poźvie byli paznačanyja data i numar kabinieta, kudy treba było źjavicca ŭ pryznačany čas. Ale daviałosia pačakać i pad dźviaryma: u kabiniet užo stajała nievialikaja čarha. U jaho zaprašali pa adnym.
Za dźviaryma try žančyny raspytvali kožnaha, što zdaryłasia, i ŭščuvali «za pavodziny». Tłumačyli, što pakarańnie paniesiena zasłužana i raili nadalej «nie paŭtarać pamyłak». U siarednim hutarka praciahvałasia nie bolš za 15—20 chvilin.
Z ubačanaha vynikała, što ŭ vykankamach jość śpisy z paznačeńniem miescaŭ žycharstva niadaŭna asudžanych. U čarzie byli i tyja, chto adbyŭ «sutki», i aštrafavanyja za administracyjnyja pravaparušeńni.
Paŭnamoctvy padobnych ideałahičnych hrup abmiažoŭvajucca ŭnutranymi rasparažeńniami vykankama — orhana, jaki ich stvaryŭ. Adkaznaść za ihnaravańnie padobnych vyklikaŭ nibyta i nie praduhledžana. Tym nie mienš, viciablanie ličać za lepšaje nie abvastrać situacyju, bo śpisy «niadobranadziejnych» vidavočna pastupajuć ź milicyi, a spravazdača ab praviedzienych hutarkach, mahčyma, taksama pojdzie ŭ hetuju ŭstanovu.
Čytajcie taksama:
Što za kabiniety, dzie prapahandysty zapisvajuć intervju z zatrymanymi?
