U Kijevie chočuć pierajmienavać vulicu Niomanskuju, bo heta «rasijski taponim». Ale kolki ŭ Niomanie rasijskaha?
Pietycyja z prośbaj pierajmienavać vulicu Niomanskuju ŭ honar Dmytra «Da Vinčy» Kaciubajły sabrała podpisy za adnu hadzinu, paviedamiła vajennasłužačaja i dziaŭčyna Kaciubajły Alina Michajłava.
Nioman. Fota: Wikimedia
Pietycyju na sajcie Kijeŭskaj rady zarehistravała ŭkrainskaja aktrysa Ada Rohaŭcava.
«Vulica Niomanskaja ŭ Piačerskim rajonie horada Kijeva nazvanaja ŭ honar raki Nioman, jakaja praciakaje pa Kalininhradskaj vobłaści Rasii. Rasijskija taponimy nie pavinny być ušanavanyja ŭ haradskoj prastory stalicy Ukrainy», — havorycca ŭ apisańni pietycyi.
Taksama Rohaŭcava padkreśliła, što Kijeŭ pavinien šanavać hierojaŭ, jakija addali žyćcio za niezaležnaść Ukrainy. Tamu vulicu Niomanskuju, na dumku aktrysy, varta pierajmienavać u honar Dmytra Kaciubajły.
Ale kolki ŭ Niomanie rasijskaha?
Najbolšy adrezak Niomana pralahaje ŭ Biełarusi — 462 kiłamietry. Tut raka i biare pačatak. Dalej — Litva, 359 kiłamietraŭ. Pryčym u Litvie raka Nioman najdaŭžejšaja ŭ krainie. Jašče 17,3 kiłamietra pralahaje praź biełaruska-litoŭskuju miažu. I tolki 98,7 kiłamietra prypadaje na miažu Litvy i Kalininhradskaj vobłaści Rasii. Pry tym, što sama Kalininhradskaja vobłaść častkova znachodzicca na terytoryi tak zvanaj histaryčnaj «Małoj Litvy».
A što datyčna samoj nazvy, to viersij jaje ŭźniknieńnia nadzvyčaj šmat, ale dakładna možna skazać, što jana maje bałckaje pachodžańnie.
Siońnia vulica Niomanskaja znachodzicca ŭ Piačerskim rajonie Kijeva, pačynajecca ad bulvara Mikałaja Michnoŭskaha i praciahvajecca da vulicy Michajła Bojčuka.
Dmytro Kaciubajła zahinuŭ pad Bachmutam 7 sakavika. «Da Vinčy» było 27 hadoŭ. Jon udzielničaŭ u rasijska-ŭkrainskaj vajnie z 2014 hoda, byŭ kamandziram uzvoda dobraachvotnikaŭ, a zatym — kamandziram roty. Atrymaŭ ciažkaje ranieńnie ŭ Piaskach Danieckaj vobłaści, ale paśla vyzdaraŭleńnia viarnuŭsia na front. U sakaviku 2016 hoda jon byŭ pryznačany kamandziram pieršaj asobnaj šturmavoj roty «Vaŭki Da Vinčy», jakaja paźniej stała bataljonam.
ŭsio