U Minsku pačaŭsia sud nad adnym ź lidaraŭ tvorčaha abjadnańnia «Pahonia» Hienadziem Drazdovym
Mastaka abvinavačvajuć u «sadziejničańni ekstremisckaj dziejnaści».
Hienadź Drazdoŭ. Hrodna, 12 kastryčnika 2017 hoda. Fota: «Radyjo Svaboda»
Praces nad byłym kiraŭnikom tvorčaha abjadnańnia «Pahonia», mastakom Hienadziem Drazdovym pačaŭsia 2 maja ŭ Minskim haradskim sudzie. Spravu razhladaje sudździa Jaŭhien Pisarevič, paviedamlaje «Radyjo Svaboda» sa spasyłkaj na BPN.
Drazdova abvinavačvajuć pa č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadcki paradak, abo aktyŭny ŭdzieł u ich) i č. 1 art. 361-4 (sadziejničańnie ekstremisckaj dziejnaści) Kryminalnaha kodeksa.
Pra zatrymańnie mastaka ŭ siaredzinie žniŭnia 2022 hoda tady paviedamiła Biełaruskaja rada kultury. Akramia taho, u adnym z praŭładnych telehram-kanałaŭ źjaviŭsia videazapis z Drazdovym i paviedamleńnie, što zatrymali «tvorčuju asobu», jakaja prybyła z Ukrainy.
U mužčyny siłaviki nibyta vyjavili sumiesnyja fota z ukrainskimi vajskoŭcami. Taksama śćviardžałasia, što ŭ 2020 hodzie mastak nibyta «braŭ niepasredny ŭdzieł u błakavańni daroh, razmaŭlaŭ z radykalna nastrojenymi apazicyjanierami, raspracoŭvajučy płany akcyj «pramoha dziejańnia».
Na videazapisie Drazdoŭ skazaŭ, što «zatrymany supracoŭnikami milicyi nieviadoma za što». Na kadrach z kvatery mastaka byli vidać nievialikija nacyjanalnyja ściahi i bieł-čyrvona-biełyja stužki, raskidanyja knihi i karcina ź viadomaj aktyvistkaj Ninaj Bahinskaj.
Adrazu paviedamlałasia, što suprać 64-hadovaha Hienadzia Drazdova zaviali kryminalnuju spravu za «aktyŭny ŭdzieł u akcyjach pratestu» ŭ 2020 hodzie (art. 342 KK).
Paźniej stała viadoma, što jaho taksama vinavaciać u «sadziejničańni ekstremisckaj dziejnaści» (č. 1 art. 361-4 KK).
