Aptovaja cana elektraenierhii ŭ Niderłandach dasiahnuła admoŭnych značeńniaŭ. Heta ŭsio z-za pracy vietrakoŭ
Na tarhach na Amsterdamskaj biržy Epex Spot u sieradu košt kantraktu z dastaŭkaj na nastupny dzień apuskaŭsia da -739,96 jeŭra za MVt*h. Siarednieŭzvažany košt zastavaŭsia admoŭnym na praciahu ŭsiaho handlovaha dnia — kožnuju hadzinu z 10 da 17 hadzin, paviedamlaje Bloomberg.
Pryčynaj źjavy stała zanadta vysokaja hienieracyja ŭ siektary ŭznaŭlalnaj enierhietyki: abjomy vyrablenaj na vietranych stancyjach elektryčnaści pieravysili sukupny popyt, i sietki dapłačvali klijentam za dadatkovaje spažyvańnie.
Letaś ceny na elektryčnaść, naadvarot, zaškalvali, a Jeŭropa pieražyvała sapraŭdny enierhietyčny kryzis. Uładzimir Pucin papiaredžvaŭ, što zialony pierachod, maŭlaŭ, vyjdzie jeŭrapiejcam bokam.
Ceny na haz u Jeŭropie zaškalvajuć, pałochaŭ Pucin u śniežni. A pakolki Rasija niekatorym svaim partnioram pradaje haz u 10 ź lišnim razoŭ tańniej, heta stabilizuje jaje ekanomiku.
Tak Pucin kazaŭ na pačatku śniežnia 2022 hoda. Z taho času cana hazu ŭ Jeŭropie źmienšyłasia prykładna ŭ 3,5 razu.
Čytajcie taksama:
Budynki buduć źmianiać koler dla ekanomii enierhii
The Telegraph: Zdolnaść Pucina da enierhietyčnaha šantažu značna źniziłasia
