Śpiecnaz HRU amal całkam pahinuŭ va Ukrainie — sakretnyja dakumienty ZŠA
Pa acenkach aŭtaraŭ dakumienta, niekatoryja bryhady śpiecnaza HRU mahli stracić da 90-95% asabovaha składu.
Dadzienaja staronka z vyjavami źjaŭlajecca častkaj adnaho sa źlitych u internet sakretnych dakumientaŭ ZŠA. Tut adlustravany asnoŭny park vajskovaj techniki 22-oj asobnaj hvardziejskaj bryhady śpiecyjalnaha pryznačeńnia HRU RF. Vyjava źleva datujecca listapadam 2021 hoda, a vyjava sprava — listapadam 2022 hoda (praz 9 miesiacaŭ z momantu pačatku vajny va Ukrainie). Fota: častka dakumienta pakazana vydańniem The Washington Post
Rasijskaje HRU straciła vielizarnuju kolkaść svaich bajcoŭ śpiecnaza padčas vajny suprać Ukrainy. Heta stała viadoma dziakujučy adnamu sa źlitych sakretnych dakumientaŭ ZŠA, jakija patrapili ŭ internet z-za ŭnutranych uciečak. Infarmacyju z hetaha dakumienta 14 krasavika apublikavała vydańnie The Washington Post.
Zhodna z atrymanymi źviestkami, amierykanskaja vyviedka zafiksavała značnyja straty ŭ 4 z 5 bryhad śpiecnaza HRU, adpraŭlenych vajavać suprać Ukrainy (usiaho ŭ HRU, pavodle aficyjnych adkrytych krynic, jość tolki 8 suchaputnych bryhad śpiecnaza z ahulnaj kolkaściu bajcoŭ da 10 tysiač čałaviek).
«Pavodle dakumienta, z 5 asobnych bryhad śpiecnaza HRU, adpraŭlenych va Ukrainu ŭ 2022 hodzie, 4 sutyknulisia z ašałamlalnymi stratami. 22-aja i dźvie inšyja bryhady stracili ad 90 da 95% asabovaha składu. U 346-aj hvardziejskaj bryhadzie, naprykład, z 900 čałaviek zastalisia tolki 125», — piša The Washington Post sa spasyłkaj na źlity dakumient.
Va ŭciečcy adznačajecca, što takija vialikija straty źviazany z vykarystańniem «elitnaha» śpiecnaza ŭ jakaści zvyčajnaj piachoty i harmatnaha miasa dla padtrymańnia tempaŭ rasijskaha nastupu.
Vyviedka ZŠA ličyć, što na adnaŭleńnie takich strat spatrebicca da 10 hadoŭ, nie kažučy ŭžo pra toje, što Rasija tym samym pazbaviłasia najbolš padrychtavanych da vajny bajcoŭ i ich navykaŭ pa viadzieńni dyviersij i zboru infarmacyi.
Nahadajem, što u pačatku krasavika ŭ ŚMI źjaviłasia infarmacyja ab źlivach u internet bolš za 100 sakretnych dakumientaŭ ZŠA, jakija tyčacca dziejnaści amierykanskaj vyviedki ŭ adnosinach da mnohich krain śvietu (u tym liku i da Biełarusi).
U ZŠA pa fakcie ŭciečak zvyšsakretnaj infarmacyi zaviali kryminalnuju spravu i ŭžo aryštavali mierkavanaha vinoŭnika źlivaŭ.
Čytajcie taksama:
Rasija i AAE damovilisia ab sumiesnaj baraćbie suprać ZŠA i Vialikabrytanii — źlivy
