U Homieli debašyr źbiŭ rabotnikaŭ chutkaj. Jaki prysud jon atrymaŭ?
Niadzielnym viečaram 41-hadovy pjany mužčyna išoŭ u hości da maci. Na apošnim leśvičnym pralocie jon straciŭ raŭnavahu, spatyknuŭsia i ŭpaŭ.
Ubačyŭšy syna, jaki lažaŭ u kryvi, piensijanierka spałochałasia i vyklikała chutkuju. Čym skončyłasia hetaja historyja, raspaviali belkagomel.by u prakuratury Homiela.
Miedyki zanieśli mužčynu ŭ kvateru i stali akazvać jamu pieršuju dapamohu. Toj chutka pryjšoŭ u siabie, ale raptam razzłavaŭsia i staŭ pradjaŭlać maci pretenzii za toje, što taja vyklikała chutkuju bieź jaho dazvołu.
Fielčar u hety čas sprabavaŭ pamierać mužčynu tempieraturu, ale jon kryčaŭ i razmachvaŭ rukami. A zatym i zusim uskočyŭ z łožka i ŭdaryŭ miedyka pa hałavie.
Kaleha fielčara schapiła sumku ź miedykamientami i zabrała jaje ŭ kalidor, dalej ad debašyra, kab jon nieznarok nie paškodziŭ jaje źmieściva. Ale heta jašče bolš razzłavała mužčynu, i jon vyrašyŭ adabrać u miedykaŭ sumku.
Fielčar pasprabavaŭ suniać pacyjenta, ale toj znoŭ udaryŭ jaho, a zatym u šalenstvie razarvaŭ na im vopratku. Vybraŭšysia z kvatery, miedyki adrazu vyklikali milicyju.
Na dopycie abvinavačany pryznaŭ, što niecenzurna łajaŭsia na adras miedykaŭ, pahražaŭ hvałtam i ŭžyvaŭ jaho: udaryŭ fielčara, razarvaŭ na im vopratku, šturchnuŭ doktara, ale ŭ sudzie ŭsio heta admaŭlaŭ.
U adpaviednaści z častkaj 2 artykuła 339 Kryminalnaha kodeksa (chulihanstva, ździejśnienaje paŭtorna) sud asudziŭ jaho da dvuch hadoŭ abmiežavańnia voli z nakiravańniem u papraŭčuju ŭstanovu adkrytaha typu (chimija).
Mužčyna publična prynios miedykam prabačeńni ŭ sudzie, ale vinu faktyčna pryznaŭ tolki častkova, — patłumačyła pamočnica prakurora Iryna Pasiuk.