«Niechta napisaŭ danos». U Jekaciarynburhu zatrymali byłoha mera Rojzmana
Palicyja Jekaciarynburha zatrymała byłoha mera horada Jaŭhiena Rojzmana i paviezła ŭ adździeł MUS, kab skłaści ŭ dačynieńni da jaho administracyjny pratakoł pa artykule ab demanstracyi ekstremisckaj simvoliki.
Ilja Vaha / It's My City
Pra heta vydańniu It's My City paviedamili byłaja žonka Rojzmana Julija Kruciejeva i advakat palityka Uładzisłaŭ Idamžapaŭ.
Rojzmana zatrymali praz danos, napisany ŭ śniežni 2022 hoda, raspaviała Kruciejeva. Pavodle jaje słoŭ, u skarzie havaryłasia, što Rojzman nibyta raźmiaściŭ u UK ekstremisckuju simvoliku, zrabiŭšy pierapost ad kamandy Alaksieja Navalnaha.
«Pierapost byŭ zrobleny ŭ hrupie «Jaŭhien Rojzman», da jakoj jon dačynieńnia nie maje i viedać nie viedaje, chto heta zrabiŭ. Takich hrup va UK paradku 20», — paviedamiła Julija Kruciejeva ŭ fejsbuku. Kruciejeva i advakat zapeŭnivajuć, što ŭ Rojzmana niama staronki va UK, jon nikoli nie karystaŭsia hetaj sacsietkaj.
Čakajecca, što sud u Jekaciarynburhu razhledzić administracyjny pratakoł u dačynieńni da Rojzmana 16 sakavika. Palityku pahražaje da 15 sutak administracyjnaha aryštu pa artykule ab demanstracyi ekstremisckaj simvoliki. Ale, jak adznačaje It's My City, praz kryminalnuju spravu, raspačatuju raniej, sud moža adpravić Rojzmana ŭ SIZA.
U žniŭni 2022 hoda Jaŭhiena Rojzmana zatrymali pavodle kryminalnaj spravy ab «dyskredytacyi» rasijskaha vojska. Sud pryznačyŭ Rojzmanu mieru strymańnia ŭ vyhladzie zabarony peŭnych dziejańniaŭ: jamu zabaranili naviedvać publičnyja miescy i karystacca internetam.
