U Biełarusi zatrymali tadžykskaha apazicyjnaha aktyvista. Jamu pahražaje departacyja ŭ Tadžykistan
U Biełarusi zatrymali tadžykskaha apazicyjnaha aktyvista Nizamidzina Nasrydzinava. Jamu pahražaje departacyja ŭ Tadžykistan, paviedamlaje tadžykskaja słužba «Radyjo Svaboda» sa spasyłkaj na pradstaŭnika biełaruskaj pravaabarončaj arhanizacyi Human Constanta Eniru Branickuju.
Jaho zatrymali 8 studzienia pry pierasiačeńni miažy Biełarusi na zapyt uład Tadžykistana. Ciapier Nasrydzinaŭ znachodzicca ŭ SIZA ŭ Hrodnie. 21 lutaha Hienieralnaja prakuratura Biełarusi pryniała rašeńnie ab ekstradycyi Nasrydzinava ŭ Tadžykistan. Nizamidzin Nasrydzinaŭ abskardziŭ hetaje rašeńnie ŭ sudzie.
Nasrydzinaŭ z kastryčnika 2015 hoda žyvie ŭ Niamieččynie. Ułady FRH dali jamu i členam jaho siamji palityčny prytułak. U 2017 hodzie Nasrydzinaŭ na hadavym schodzie ABSIE ŭ Varšavie nazvaŭsia siabram zabaronienaj u Tadžykistanie «Hrupy 24». Adzin z pradstaŭnikoŭ hetaha apazicyjnaha ruchu zajaviŭ, što Nasrydzinaŭ nie źjaŭlajecca siabram «Hrupy 24» z 2018 hoda.
Pavodle źviestak Eniry Branickaj, u Tadžykistanie suprać Nasrydzinava raspačata kryminalnaja sprava ab publičnych zaklikach da ekstremisckaj dziejnaści abo apraŭdańni ekstremizmu (artykuł 307(1) KK). Za heta złačynstva ŭ Tadžykistanie praduhledžana pakarańnie ŭ vyhladzie pazbaŭleńnia voli na termin ad troch da piaci hadoŭ.
«Kali raspačata kryminalnaja sprava — nam nieviadoma, źviestak pra heta ŭ nas niama. Padziei, jakija inkryminujucca jamu, apisvajucca tak: z 24 vieraśnia 2016 hoda da 23 kastryčnika 2016 hoda Nasrydzinaŭ na svajoj staroncy ŭ fejsbuku raspaŭsiudziŭ ekstremisckija materyjały zabaronienych u krainie «Hrupy 24» i Partyi isłamskaha adradžeńnia Tadžykistana, a ŭ pieršaj pałovie 2017 hoda zapisaŭ na videa svajo vykazvańnie suprać prezidenta i ŭrada Tadžykistana», — raspaviała jana.
Pavodle jaje słoŭ, prakuratura pry pryniaćci rašeńnia nie ŭličvała, što Nasrydzinaŭ užo znachodzicca pad mižnarodnaj abaronaj u Niamieččynie, a ŭ Tadžykistanie jamu pahražajuć katavańni i niespraviadlivy sudovy pieraśled. Nie było pryniata pad uvahu i toje, što raniej svajakoŭ Nasrydzinava hvałtoŭna viarnuli ŭ Tadžykistan, dzie asudzili da vialikich terminaŭ pazbaŭleńnia voli.
Nasrydzinaŭ abskardziŭ pastanovu Hienprakuratury Biełarusi. Čakajecca, što ŭ kancy sakavika jaho zajava budzie razhledžana sudom Hrodzienskaj vobłaści. Pravaabaroncy vykazvajuć nadzieju, što hetym razam sudom budzie pryniata pad uvahu pastanova ŭład Niamieččyny ab nadańni Nasrydzinavu palityčnaha prytułku.
