Bolš za 8 tysiač hramadzian Biełarusi majuć pa dva biełaruskija pašparty. Jak heta i navošta?
U Biełarusi zaraz dazvolena atrymlivać adrazu dva bijamietryčnyja pašparty, čym karystajucca niekatoryja hramadzianie, jakija časta jeździać za miažu, paviedamiŭ namieśnik načalnika Departamienta hramadzianstva i mihracyi MUS Pavieł Chryščanovič, piša «Sputnik».
Pradstaŭnik MUS rastłumačyŭ, što dva pašparty patrebny, kab adzin zdać u pasolstva na atrymańnie vizy, a druhim karystacca ŭ hety čas unutry krainy.
«My prapanavali atrymać hramadzianam dva zusim identyčnyja pašparty, ale, viadoma, z roznymi numarami», — skazaŭ Pavieł Chryščanovič.
Jon dadaŭ, što takoj opcyjaj skarystałasia bolš jak 8 tysiač čałaviek.
A ŭsiaho dla vyjezdu vydadziena bolš za 135 tysiač bijamietryčnych pašpartoŭ.
Hramadzianie Biełarusi mohuć atrymlivać bijamietryčnyja dakumienty pa žadańni. Ale dla zamiežnych hramadzian, jakija pastajanna žyvuć u krainie, heta abaviazkova. Kali skončyŭsia dazvoł na žycharstva, možna atrymać tolki ID-kartu.
U cełym bijamietryčnyja dakumienty jość prykładna ŭ 2 % nasielnictva.
ID-kartu, jak rastłumačyŭ Pavieł Chryščanovič, pieršy raz možna atrymać tolki pa miescy rehistracyi, a potym užo ŭ lubym rehijonie krainy abo ŭ stalicy.
Namieśnik dyrektara pa infarmacyjnych technałohijach Nacyjanalnaha centra elektronnych pasłuh Jahor Voranaŭ dadaŭ, što płanujecca ŭvieści identyfikacyju ŭ dziaržaŭnych anłajn-servisach praz ID-kartu. Dla hetaha buduć patrebny tolki karta i smartfon z čypam NFC.
