Biełaruskija pamiežniki paskardzilisia, što ŭkrainskija paviesili na drevie pudziła «rasijskaha Valery»
Pamiežniki zastavy «Hłuškavičy», što ŭ Lelčyckim rajonie Homielskaj vobłaści, raspaviali pra pavieličeńnie kolkaści «pravakacyj» z boku ŭkrainskich kaleh, piša «Zierkało».
Makiet paviešanaha rasijskaha vajskoŭca na ŭkrainska-biełaruskaj miažy. Zastava «Hłuškavičy», Biełaruś, sakavik 2023 hoda. Fota: kadr videa ANT
U siužecie ANT pieraličvajecca, što mienavita robiać ukrainskija pamiežniki: «Psavańnie infrastruktury, ahresiŭnyja žesty, u tym liku sa zbrojaj, abraźlivyja nadpisy na darožnych znakach, ulotki z zaklikami i aŭdyjazapisy palityčnaha charaktaru, zvanki z pahrozami apieratyŭnym dziažurnym». Praŭda, što ŭtrymlivajecca va ŭlotkach, pra što havorycca ŭ aŭdyjozapisach i jak mienavita pahražajuć apieratyŭnym dziažurnym, supracoŭniki telekanała nie paviedamili.
Namieśnik načalnika pamiežnaj zastavy «Hłuškavičy» Uładzisłaŭ Ziankovič paskardziŭsia, što z boku Ukrainy pačali zaśviečvać łazieram videakamiery i stavić fotapastki, kab zdymać biełaruskich pamiežnikaŭ.
Namieśnik načalnika pamiežnaj zastavy «Hłuškavičy» Uładzisłaŭ Ziankovič. Fota: kadr videa ANT
«Praktyčna štodnia čutnyja streły roznyja. Byŭ ustalavany makiet paviešanaha vajskoŭca ŭ formie rasijskaha vojska, jakoha ŭkrainskija pamiežniki nazvali Valeram. Skazali, što heta vajskoviec, zabity pad Kijevam. Heta ŭsio z metaj niejkaha zastrašvańnia i psichałahičnaha cisku na vajskoŭcaŭ, jakija achoŭvajuć dziaržaŭnuju miažu našaj krainy.
Nizkaja dyscyplina voinskich farmavańniaŭ, jakija achoŭvajuć miažu, dazvalaje mierkavać, što moža adbycca navat vypadkovy streł jaki-niebudź, jaki moža spravakavać situacyju dalej», — vykazaŭ svaje aściarohi Ziankovič.
Ukrainskaja pahranzastava, jakaja miažuje ź biełaruskaj «Hłuškavičy» Lelčyckaha rajona Homielskaj vobłaści. Fota: kadr videa ANT
