«Znajšli dakumient za podpisam Budanava». Vyniesieny prysud pa spravie za «ahienturnuju dziejnaść na karyść Ukrainy»
U Homielskim abłasnym sudzie 9 sakavika ahučyli prysud pa spravie za «ahienturnuju dziejnaść na karyść Ukrainy», paviedamlajuć pravaabaroncy.
Pavieł Kupryjenka na sudzie. Fota: «Homielskaja praŭda»
Hramadzianinu Ukrainy Paŭłu Kupryjenku pryznačyli pavodle art. 358-1 (ahienturnaja dziejnaść) siem hadoŭ kałonii va ŭmovach uzmocnienaha režymu.
Žychara Homielščyny Tarasa Mačynskaha abvinavacili ŭ «zdradzie dziaržavie» (č. 1 art. 356 KK) i prysudzili 10 hadoŭ kałonii va ŭmovach uzmocnienaha režymu.
32-hadovaha Dźmitryja Sałaviančyka pryznali vinavatym va «ŭkryvalnictvie śladoŭ ciažkaha złačynstva» (č. 1 art. 405 KK) i pryznačyli štraf u pamiery 400 bazavych vieličyń (14 800 rubloŭ).
Taki prysud vynies sudździa Rusłan Caruk. Praces prachodziŭ z 14 lutaha ŭ zakrytym režymie.
Čatyry miesiacy tamu na dziaržaŭnym telebačańni vypuścili videasiužet, u jakim paviedamlałasia, što «KDB Biełarusi spyniŭ dziejnaść ahientury vajennaj raźviedki Ukrainy». U siužecie pakazvajucca try zatrymanyja. Heta hramadzianin Ukrainy, pradprymalnik Pavieł Kupryjenka i dva hramadzianina Biełarusi, žychary Homielščyny Dźmitryj Sałaviančyk i Taras Mačynski. Pry hetym, paviedamlajecca, što Mačynski atrymaŭ biełaruskaje hramadzianstva tolki ŭ 2010 hodzie — prapahandysty jaho nazyvajuć «byłym ukraincam». A Sałaviančyk pracavaŭ kurjeram u kampanii Kupryjenki.
Paviedamlajecca, što ŭ Paŭła Kupryjenki «byli zadańni, u tym liku, pa manitorynhu hramadska-palityčnaj abstanoŭki ŭ Biełarusi». U jaho nibyta znajšli dakumient za podpisam načalnika Hałoŭnaha ŭpraŭleńnia raźviedki Minabarony Ukrainy Kiryła Budanava. Prapahandysty śćviardžajuć, što Kupryjenku zavierbavali ŭkrainskija śpiecsłužby.
Tarasa Mačynskaha abvinavačvajuć u tym, što jon pieradavaŭ danyja ab raźmiaščeńni i pierasoŭvańni pa Biełarusi vajskovaj techniki Kupryjenku, a toj, u svaju čarhu, — ukrainskim śpiecsłužbam.
Paviedamlajecca, što Sałaviančyka «vykarystoŭvali ŭciomnuju». U videasiužecie raspaviadajuć, što Dźmitryj zdymaŭ pieramiaščeńnie vajennaj techniki ŭ Biełarusi i prasiŭ pra heta rodnych, a potym pieradavaŭ Kupryjenku, «nie viedajučy, dla čaho jany jamu».
20 kastryčnika pra ich zatrymańnie vykazvaŭsia kiraŭnik KDB Ivan Cierciel. «My bačym aktyvizacyju viadzieńnia ahienturnaj raźviedki z boku ŭkrainskich zamiežnych śpiecsłužbaŭ. Zusim niadaŭna nami była spynienaja praca na našaj terytoryi stvoranaj vajennaj vyviedkaj Ukrainy rezidentury. Zatrymany rezident, hramadzianin Ukrainy, i dvoje našych hramadzian, jakija ŭstupili na šlach zdrady i pracavali ŭ intaresach zamiežnaj dziaržavy», — skazaŭ jon.
KDB spatrebiłasia try miesiacy dla rasśledavańnia hetaj spravy i pieradačy jaje ŭ sud.
