Łukašenka nazvaŭ Zialenskaha «hnidaj», a «Bajpoł» — «mudakami»
«Vysnova adna. Ja jašče niejak dumaŭ, što Ukrainie patrebny mir, što Zialenski pieražyvaje za svoj narod. Prezident Zialenski — prosta hnida. Prosta hnida! Takija apieracyi nie pravodziacca biez uzhadnieńnia z kiraŭnikom krainy i hałoŭnakamandujučym», — zajaviŭ Alaksandr Łukašenka 7 sakavika.
Alaksandr Łukašenka, 7 sakavika, skrynšot ź videa
7 sakavika Alaksandr Łukašenka pryznaŭ, što ŭ vyniku dyviersii 26 lutaha na aeradromie Mačuliščy byŭ paškodžany rasijski samalot-raźviedčyk A-50, jaki vykarystoŭvaŭsia dla naviadzieńnia rakiet i dronaŭ na celi va Ukrainie.
Raniej dzieviać dzion dziaržaŭnyja ŚMI i aficyjnyja asoby nazyvali ataku «fejkam».
Adkaznaść za ataku ŭziali na siabie biełaruskija padpolščyki ź incyjatyvy siłavikoŭ suprać dyktatury «Bajpoł», ale Łukašenka ŭskłaŭ adkaznaść za ataku na ŭkrainskuju raźviedku i abrynuŭsia z pahrozami jak kiraŭnictvu Ukrainy, tak i biełaruskamu hramadstvu.
«Vysnova adna. Ja jašče niejak dumaŭ, što Ukrainie patrebny mir, što Zialenski pieražyvaje za svoj narod. Prezident Zialenski — prosta hnida. Prosta hnida! Takija apieracyi nie pravodziacca biez uzhadnieńnia z kiraŭnikom krainy i hałoŭnakamandujučym. < … >
Hnida tamu, što jon biehaje vakoł Biełarusi, dasyłaje da nas ludziej i prosić, jak ja ŭžo kazaŭ: «Davajcie zaklučym pakt ab nienapadzie, davajcie damovimsia, u nas z vami niama nijakich prablem». Na što ja kazaŭ: «My nie źbirajemsia napadać». — «Nie, davajcie padpišam damovu pad patranažam Arhanizacyi Abjadnanych Nacyj, što vy na nas nie napadziecie». Vy čuli maje ŭsie hetyja zajavy.
I ŭ hety čas … što ž, vyklik kinuty», — zajaviŭ Łukašenka.
«Bajpoł» ža, pa słovach Łukašenki, — «mudaki», bo «jany kryčali, što «ŭsie, užo tyja, chto ździejśniŭ u Mačuliščach terakt, jany ŭžo za miažoj». Hetym samym jany ŭ nas padšturchnuli vieru ŭ toje, što jany tut. Kali b byli za miažoj, jany b ich pakazali. Jany prosta prakałolisia jak mudaki apošnija. I my aktyŭna pačali pošuki tut».
U minułym padobnyja śćviardžeńni Alaksandra Łukašenki nie raz akazvalisia chłuśnioj.
Alaksandr Łukašenka taksama zajaviŭ, što rasparadziŭsia pravieści pa ŭsioj krainie žorstkuju začystku. Ź jahonych słoŭ, zahad pra takuju začystku byŭ dadzieny jašče da dyviersii suprać rasijskaha samalota DRŁA A-50.
«Kab nie było razmoŭ, usie pavinny razumieć, i ja hetaha nie admaŭlaju, — ja rasparadziŭsia niekalki dzion tamu (jašče da hetaj apieracyi) pa ŭsioj krainie pravieści vielmi žorstkuju začystku», — skazaŭ Łukašenka, vystupajučy pierad žančynami, jakich jon uznaharodžvaŭ z nahody 8 Sakavika, pieradaje jaho pres-słužba.
Łukašenka prapanavaŭ biełarusam, źviazanym z antyłukašenkaŭskim padpollem, zdavacca, pakul da ich nie pryjšli siłaviki.
«Heta nam urok. Jany schavalisia i siadziać. Siadziać i čahości čakajuć, — pahražaŭ jon. — Ničoha nie źmianiłasia. Tamu my ich pavinny znajści. A im ja chaču skazać, kab jany rychtavalisia. My ŭžo da ich idziom. Našy chłopcy ŭžo na parozie, chaj rychtujucca. Najlepšy varyjant — kali jany pryjduć sami: ruki ŭvierch, pryjduć i zdaducca. Heta budzie dla ich vyratavańnie. My ich vyličym ŭsich. Vyčyścim prosta z našaha hramadstva», — pahražaŭ Alaksandr Łukašenka ŭsim niazhodnym ź im.
Na dumku Alaksandra Łukašenki, biełarusy za minułyja dva z pałovaj hady ničoha nie zrazumieli.
«Jany za hetyja dva z pałovaj hady tak ničoha i nie zrazumieli. Jany nie zrazumieli, što my da ich pa-ludsku: kali vy adumalisia — viartajciesia. I heta nie admianiaje ničoha. Jość tam adurełyja, adurmanienyja, chaj viartajucca. Zajavy ŭžo pastupajuć. Ale tyja, chto ździajśniali, a asabliva ciapier ździajśniajuć voś takija padobnyja pravaparušeńni, — my ich znojdziem», — zajaviŭ Alaksandr Łukašenka.
Alaksandr Łukašenka zajaviŭ, što samalot A-50 u Mačuliščach byŭ tolki niaznačna paškodžany.
«Na ščaście, samalot nie źviedaŭ niejkich značnych paškodžańniaŭ, akramia, jak jany kažuć, drapin i adnoj praboiny ŭ korpusie, jakaja vajskovamu samalotu nie pieraškadžaje vykonvać jaho abaviazki», — skazaŭ Alaksandr Łukašenka, pavodle jaho pres-słužby.
Raniej biełaruskija dziaržaŭnyja ŚMI nazyvali incydent na aeradromie z rasijskim samalotam A-50 fejkam, admaŭlali, što ź im niešta zdaryłasia.
Łukašenka zajaviŭ, što «niahledziačy na zachavańnie samalotam zdolnaści vykonvać zadačy, jon paprasiŭ rasijan dasłać inšy».
«My vam pakazvali hety samalot. Jak mnie paviedamili, jon navat prezidenta sustrakaŭ, kali ja viartaŭsia ź Piekina.
Tym nie mienš, my paprasili rasijan, kab jany ŭziali hety samalot na absłuhoŭvańnie i dasłali nam inšy. Tak i adbyłosia», — skazaŭ jon.
Nasamreč, nijaki novy samalot dalniaj raźviedki anałahičnaha typu ŭ Biełarusi naziralniki pakul nie adznačali.
Na minułym tydni samalot A-50 vylecieŭ na ramont na Tahanrohski zavod i nie viarnuŭsia, choć dziaržaŭnyja ŚMI ŭ toj dzień zajaŭlali, što samalot ažyćciaŭlaje ablot terytoryi Biełarusi i vykonvaje bajavyja zadačy.
Jak śćviardžajuć vajskovyja ekśpierty, samalot A-50 vykarystoŭvaŭsia dla naviadzieńnia na celi va Ukrainie rasijskich rakiet i dronaŭ.
Pa słovach Łukašenki, pry padrychtoŭcy «terakta» vykarystoŭvalisia «samyja vysokija technałohii». «Heta sapraŭdy było štości nievierahodnaje», — skazaŭ jon.
I panarakaŭ, što abrali mały bieśpiłotnik:
«Tamu što, kali b jany vykarystoŭvali vialiki, to sistemy našaha sačeńnia, viadoma, jaho b adsačyli. Va Ukrainie byli zadziejničanyja hetyja dva bieśpiłotniki, navučany hety čałaviek i inšyja, jakija jamu dapamahali. Pra heta my raskažam vam potym».
Alaksandr Łukašenka niaredka abiacaje raskazać «paśla», i što «budzie vielmi cikava», ale najčaściej za hetymi słovami niama nijakaha praciahu.
Na videa, jakija publikavaŭ «Bajpoł», da A-50 padlataŭ samy zvyčajny kamiercyjny dron kitajskaj vytvorčaści.
Sama dyviersija zdaryłasia 26 lutaha. «Bajpoł» uziaŭ adkaznaść za jaje na siabie, zajaviŭšy, što biełarusy z dapamohaj dvuch dronaŭ paškodzili samalot. Śćviardžałasia, što vykanaŭcy paśpiachova zdoleli pakinuć terytoryju Biełarusi. «Bajpoł» apublikavaŭ taksama dva videa, na jakich bačna, jak dron prylataŭ na raźviedku i siadaŭ na A-50, ale videa samoj ataki nie było.
Krynicy «Našaj Nivy» i pravaabaroncy paviedamlali pra masavyja randomnyja zatrymańni i pieratrusy ŭ rajonie Mačuliščaŭ, a taksama siarod strajkbalistaŭ, rekanstruktaraŭ i strałkoŭ.
Čytajcie taksama:
Siastra «dyviersanta» ź milicejskaj aryjenciroŭki: Jon byŭ doma ŭ hetyja dni
Krasamoŭna. Što łukašenkaŭskija kanały napisali pra vybuchi ŭ Mačuliščach
