Asudzili byłoha kiraŭnika vizavaha centra Ispanii ŭ Biełarusi Rusłana Łabanka. Sprava, chutčej za ŭsio, palityčnaja
Stała viadoma, što ŭčora ŭ Minskim haradskim sudzie pačaŭsia praces nad Rusłanam Łabankom. Padrabiaznaści spravy nieviadomyja, ale pa adnym z artykułaŭ asudzili dziasiatki biełaruskich dysidentaŭ.
Infarmacyja pra Rusłana Łabanka źjaviłasia na sajcie z raskładami, razhlad jaho spravy pryznačyli na 6 sakavika ŭ Minskim haradskim sudzie. Siarod artykułaŭ — «Dača chabaru» i, što samaje cikavaje, «Zdrada dziaržavie». Sud zakryty.
Łabanku 40 hadoŭ i raniej jon byŭ bujnym biznesoŭcam z kubinska-biełaruskimi karaniami. Rusłan ź siamjoj niekalki hod pražyŭ u Andałusii, samym haračym rehijonie Ispanii.
U 2017 hodzie jon adkryŭ turystyčnuju kampaniju Peace Tour, jakaja isnavała ŭ Rasii i Biełarusi, a taksama byŭ zasnavalnikam vizavaha centra Ispanii ŭ Minsku. Turystyčny biznes u jaho byŭ i ŭ samoj Ispanii. Jaho prymali na vielmi vysokim uzroŭni, miarkujučy pa staronkach u sacsietkach i paviedamleńniach u ŚMI.
Rusłan Łabanok na viečary ispanskaj kultury ŭ minskaj fiłarmonii. Druhi źleva — Pavieł Łatuška, tahačasny pasoł u Ispanii. Nasuprać ich siadzić Lidzija Jarmošyna. 2017 hod. Fota: philharmonic.by
Na bazie ispanskaha vizavaha centra isnavała škoła ispanskaj movy i realizoŭvałasia šmat biełaruska-ispanskich prajektaŭ.
Nieviadoma, u čym jaho vina. Rusłana Łabanka zatrymali 25 kastryčnika 2021 hoda, a ŭsie jahonyja kampanii raptoŭna zakrylisia ŭviesnu 2022 hoda. U krasaviku 2022-ha dostup u vizavy centr Ispanii byŭ abmiežavany i ludzi nie mahli zabrać svaje dakumienty. Takim čynam, u SIZA jon pravioŭ bolš za paŭtara hoda, i ŭvieś hety čas pra jaho ničoha nie było viadoma.
Miarkujučy pa ŭsim, Rusłanu ŭžo vynieśli prysud. Pa jaho artykułach heta ad 10 da 15 hadoŭ turmy.
«Naša Niva» — bastyjon biełaruščyny
PADTRYMAĆ
