«Z aŭtobusami, kaniešnie, biada». Hramadski transpart u Viciebsku ŭ šakujučym stanie
Vydańnie «Vićbičy» apublikavała vialiki artykuł pra stan haradskoha transpartu ŭ abłasnym centry. Jak vynikaje z kamientaryjaŭ vydańniu, praca haradskoha transpartu ŭ Viciebsku znachodzicca na miažy zryvu. «U 5:30 aŭtobus vychodzić na liniju, i ŭžo a 6-j ranicy moža patelefanavać kiroŭca: «Ja złamaŭsia».
Vydańnie piša, što ŭ śniežni nie było ni dnia, kab u redakcyju nie telefanavali ludzi nakont pracy ŽKH albo transpartu, pryčym «nie škadujučy emocyj». Haradžanie skardzilisia na toje, što transpart pa raskładzie nie prychodzić, ludzi musiać niaviedama kolki čakać, u aŭtobusach i tralejbusach chaładzina, maršrutnaja sietka hramadskaha transpartu ŭ niekatoryja važnyja miescy nie dachodzić.
Karcinu, apisanuju ŭ artykule, možna było b pryniać za «žachi zahnivajučaha Zachadu», jakimi pałochajuć prapahandysty, ale nie — usio heta adbyvajecca ŭ biełaruskim abłasnym centry.
Hienieralny dyrektar AAT «Viciebskabłaŭtatrans» Siarhiej Miadźviedzieŭ paćvierdziŭ vydańniu prablemy. Jon kaža, što z tralejbusami praściej, ich park abnavili. A voś z aŭtobusami, pa jaho słovach, «kaniešnie, biada».
«My majem takija maršruty ŭ rajonach, dzie chodzić adzin aŭtobus. U 5:30 haradski pasažyrski transpart vychodzić na linii z parka, i ŭžo a 6-j ranicy ŭ dyśpietčarskuju moža patelefanavać kiroŭca: «Ja złamaŭsia», — dzielicca jon.
Pavodle Miadźviedzieva, asnoŭnaja prablema aŭtobusnaha parka — heta katastrafičnaje stareńnie, znos aŭtobusaŭ. Kala 80 pracentaŭ ź ich — z prabieham bolš za adzin miljon kiłamietraŭ.
«I heta pry tym, što aŭtobusy kožnyja 10 hadoŭ pavinny mianiacca». Kolki aŭtobusaŭ u aŭtaparku starejšyja za 10 hod, vydańnie nie piša.
Ale takaja harotnaja situacyja — heta ŭžo paśla jaje vypraŭleńnia. Bo jašče zusim niadaŭna, «litaralna try-čatyry hady tamu, abłaŭtatrans pieražyvaŭ takoje ciažkaje stanovišča, što ledź kancy z kancami zvodziŭ: nie viedali, jak vypłacić ludziam zarobak, jak zapłacić enierhietykam za pracu elektratranspartu, jak zalić paliva ŭ bak «aŭtobuśnikam» — na bienzakałoncy nie pradavali nivodnaha litra paliva», raspaviadaje vydańnie.
Ale i heta nie ŭsio.
«U 2020 hodzie naohuł była katastrofa, my nie viedali, jak zakryvać maršruty, tamu što vyjazdžać nie było na čym, — kaža Siarhiej Miadźviedzieŭ. — Aŭtapark u žałasnym stanie, daŭhoŭ kuča, nie mahli kupić zapčastak».
Aŭtapark znajšoŭ vyjście: damovilisia nabyć «beušnyja» aŭtobusy ź Minsku, za dva hady ŭ Viciebsk pryhnali 39 adzinak u rasterminoŭku.
Pryčym aŭtobusy paśla Minska taksama mieli ŭžo «prystojny prabieh, ale ŭsio ž mienšy za miljon, heta značyć ad 400 tysiač kiłamietraŭ da 600».
Tolki dziakujučy hetaj schiemie «zjaviłasia mahčymaść chacia b niejak padtrymlivać vykanańnie vychadaŭ aŭtobusaŭ na maršruty» ŭ Viciebsku.
Siarhiej Miadźviedzieŭ ledź nie z honaram dadaje, što paźniej mienavita pa takoj ža schiemie — pakupki starych staličnych aŭtobusaŭ — stali abnaŭlacca i parki inšych abłaściej. To-bok stanovišča ŭ inšych haradach, vynikaje, nie nadta lepšaje, čym u Viciebsku.
Siarhiej Miadźviedzieŭ patłumačyŭ i toje, čamu ŭ haradskim transparcie abłasnoha centra nie topiać — bo heta doraha.
«Aciapleńnie samo pa sabie doraha abychodzicca», — tłumačyć jon. Aŭtobus, pavodle čynoŭnika, nahravajecca ad ruchavika, a voś u tralejbusie «takoha nahravalnaha efiektu» niama, jany abahravajucca elektryčnaj piečkaj, jakaja spažyvaje vialikuju kolkaść elektraenierhii i «nie zaŭsiody zabiaśpiečvaje kamfortny tempieraturny režym».
«Raschodavańnie elektraenierhii na abahravańnie supastaŭnaje z vydatkami jaje na sam ruch transpartu. Z ulikam taho, što prypynki transpartu ŭ nas davoli častyja, to pry pastajannym adkryćci dźviarej ciapło sychodzić, jak kažuć, u nieba», — tłumačyć adsutnaść kamfortnych umovaŭ dla pasažyraŭ Siarhiej Miadźviedzieŭ.
Jašče adno prablemnaje pytańnie haradskoha transpartu — kiroŭcy. Siarhiej Miadźviedzieŭ kaža, što ich starajucca zavabić, adkryli ŭłasnuju aŭtaškołu, navučajuć biaspłatna, majuć svaje čatyry internaty, kab achvočyja mahli pryjazdžać z rajonaŭ, inšych haradoŭ.
Ale vynik sumny: za hod byli pryniatyja 32 čałavieki, zvolnilisia 28.
Z pryčyn takoha vydańnie nazyvaje tolki zarobak, kiroŭcy zvalniajucca i źjazdžajuć pracavać pa vachtavym mietadzie na pasažyrski transpart u Minsku. Ale Miadźviedzieŭ zapeŭnivaje, što heta nie nadta vyhadna.
Jon raspaviadaje, što hod tamu zvolnilisia 20 kiroŭcaŭ aŭtobusaŭ i 16 — tralejbusaŭ. Na toj momant u Minsktransie im abiacali zarobak 2000—2300 rubloŭ. «Ale što zdaryłasia? Siemji zastalisia tut, a ŭ stalicy treba žyć, charčavacca, dali im internat, ale takoj jakaści, što tam u samy raz było rabić ramont i meblu samim kuplać, uvohule, vialikija dachody, možna skazać, byli roŭnyja vydatkam. Miesiacy praz dva-try niekatoryja stali prasicca nazad mienavita z-za žyllovych umoŭ», — abhruntoŭvaje nierazumnaść pavodzin viciebskich kiroŭcaŭ Siarhiej Miadźviedzieŭ.
U Viciebsku z 1 listapada kiroŭcam padniali zarpłatu: harantavany naličany zarobak — 1300 rubloŭ, dla kiroŭcaŭ sa stažam — vyšejšy.
Čamu ludzi ŭsio ž taki sychodziać — uciamnaha adkazu nie prahučała.
Siońnia na linii haradskich maršrutaŭ u budnyja dni ŭ Viciebsku štodzień vychodzić 71 haradski aŭtobus, 61 tralejbus i 35 tramvajaŭ. U vychadnyja i śviatočnyja dni — na tracinu mienš.
«Naša Niva» — bastyjon biełaruščyny
PADTRYMAĆ
Piensii i zriapłaty mientam sami siabie nie zapłaciać, a vam: hrošaŭ niama, no vy tam tryvajciesia
tam ža z 2000$ zp treba 100$ za kamunałku addać.
I bilety u Łondan pa 30$, no heta tamu što jakaść kaniešnia nie bleavija