Daśledavańnie: antydepresanty mohuć vyklikać «emacyjnaje prytupleńnie»
Časta ad tych, chto prymaje antydepresanty, možna pačuć skarhi na toje, što razam z emacyjnymi prablemami źnikajuć i farby žyćcia — usio padajecca blakłym, adnastajnym, pačućci prytuplajucca. Niadaŭniaje daśledavańnie pakazała: paśla kursu preparataŭ, što kantralujuć sieratanin, dabravolcy horš prychodzili testy, źviazanyja z emacyjnaj reakcyjaj.
Fota: katemangostar / freepik.com
U daśledavańni, vyniki jakoha apublikavanyja ŭ časopisie Neuropsychopharmacology, 66 dobraachvotnikam davali albo preparat SIZZS — escytałapram, albo płaceba na praciahu nie mienš jak troch tydniaŭ. Potym udzielnikam prapanavali kahnityŭnyja testy.
Amal va ŭsich testach, piša The Guardian, u tym liku ŭ tych, što aceńvajuć uvahu i pamiać, preparat nie akazaŭ nijakaha ŭpłyvu na vynik. «Preparat nie robić ničoha drennaha dla paznavalnych zdolnaściaŭ — z hetaha punktu hledžańnia jon vielmi dobry», — kaža hałoŭnaja aŭtarka pracy, prafiesarka Kiembrydžskaha ŭniviersiteta Barbara Saakian.
Adnak dobraachvotniki, jakija prymali SIZZS, byli mienš usprymalnyja da navučańnia z zamacavańniem, jakoje patrabuje, kab ludzi reahavali na stanoŭčy ci admoŭny vynik. Udzielnikam pakazvali na ekranie dva varyjanty: A i B. Vybar A pryvodziŭ da ŭznaharody čatyry razy ź piaci, tady jak B — tolki adzin raz ź piaci. Paśla niekalkich chadoŭ ludzi vučacca vybirać A. Čas ad času vierahodnaści mianialisia miescami, i ŭdzielniku treba było adaptavacca da novych umoŭ. Hrupa SIZZS rabiła heta značna bolš pavolna.
Pa słovach prafiesarki Saakian, taki vynik — u niekatorym sensie, nieadjemny efiekt pracy antydepresantaŭ. «Jany zdymajuć častku emacyjnaha bolu, što adčuvajuć ludzi, jakija chvarejuć na depresiju, ale, na žal, zdajecca, jany pazbaŭlajuć taksama i častki zadavalnieńnia».
Prafiesarka Ketryn Charmier z Oksfardskaha ŭniviersiteta zajaviła, što artykuł daje važnuju infarmacyju pra dziejańnie preparataŭ SIZZS i moža dapamahčy ŭ raspracoŭcy lekaŭ, u jakich budzie mienš pabočnych efiektaŭ. Charmier taksama adznačyła: «Mianie niepakoić toje, što ludzi ŭbačać heta daśledavańnie i padumajuć, što heta paviedamleńnie: nie prymajcie leki. Adnak hetaja vysnova tyčycca nie ŭsich — usie ludzi ŭnikalnyja, i lačeńnie pa-raniejšamu maje terapieŭtyčny efiekt».
