U rasijskaj Dziarždumie ličać, što «Archipiełah HUŁAH» nie vytrymaŭ vyprabavańnia časam
U rasijskaj Dziarždumie prapanavali prybrać sa školnaj prahramy pa litaratury «Archipiełah HUŁAH» Alaksandra Sałžanicyna i inšyja tvory, jakija, maŭlaŭ, «nie vytrymali vyprabavańnia časam». Zamiest ich prapanujecca viarnuć tvory prasavieckich aŭtaraŭ.
«U hetym hodzie buduć uniesienyja nieabchodnyja źmieny ŭ školnuju prahramu pa litaratury, i jak minimum ceły šerah tvoraŭ savieckich aŭtaraŭ, u tym liku «Maładaja hvardyja» Alaksandra Fadziejeva, tvor Juryja Bondarava «Haračy śnieh», pavinny viarnucca ŭ školnuju prahramu.
Tyja tvory, jakija nie vytrymali vyprabavańnia časam, jakija nie adpaviadajuć rečaisnaści, «spletni v vidie viersij», jak Vysocki pisaŭ i śpiavaŭ, biez usialakaha sumnievu pavinny być sa školnaj prahramy vyklučanyja», — cytuje TASS słovy pieršaha namieśnika kiraŭnika frakcyi «Adzinaj Rasii» ŭ Dziarždumie Dźmitryja Viatkina.
Viatkin padkreśliŭ, što ŭ Dziarždumie, maŭlaŭ, nie źbirajucca «siekčy ź plača», ale majuć namier adnavić histaryčnuju spraviadlivaść u dačynieńni da savieckich tvoraŭ, jakija vychoŭvajuć pačućcio patryjatyzmu i zachoŭvajuć histaryčnuju pamiać.
«Jak pakazaŭ histaryčny analiz «Archipiełaha HUŁAHa», jaki pakul jašče nie prybrali, a ja dumaju, niadoŭha zastałosia jamu znachodzicca ŭ školnych prahramach.
Mnohija fakty Alaksandram Isajevičam byli «vysmaktanyja z palca», prydumanyja. Historyki praviarali ŭsie fakty. Była sproba atrymać za heta premiju — za toje, što jon zapeckaŭ u brudzie svaju ŭłasnuju radzimu», — skazaŭ Viatkin.
Pry hetym varta adznačyć, što raman Alaksandra Sałžanicyna «Archipiełah HUŁAH», jaki raspaviadaje pra stalinskija represii, byŭ uklučany ŭ abaviazkovuju školnuju prahramu ŭ 2009 hodzie pa daručeńni Uładzimira Pucina. Dy i sam Sałžanicyn, jaki pamior 3 žniŭnia 2008 hoda, ahulnuju movu z Pucinym pry svaim žyćci znachodziŭ.
Svajo daručeńnie Pucin, jaki zajmaŭ tady pasadu premjer-ministra, daŭ paśla sustrečy z udavoj piśmieńnika, Natallaj Sałžanicynaj. Havoračy pra vydańnie skaročanaha varyjanta knihi, jana tady vykazała nadzieju, što tyja, u kaho «niama času na try tamy, stanuć niejak mudrejšyja i macniejšyja, kali heta pračytajuć».
Pucin z hetym pahadziŭsia, nazvaŭšy «Archipiełah HUŁAH» zapatrabavanaj knihaj. «I bieź viedańnia taho, što tut vykładziena, u nas nie budzie poŭnaha ŭjaŭleńnia pra našu krainu i my ź ciažkaściu zmožam dumać pra budučyniu», — adznačaŭ jon.
