U Kijevie projdzie Marš pamiaci zahinułych za Ukrainu biełarusaŭ
26 studzienia, u dzień naradžeńnia Hieroja Ukrainy biełarusa Michaiła Žyźnieŭskaha, jaki zahinuŭ u studzieni 2014 hoda padčas Jeŭramajdanu, u Kijevie adbudziecca marš. Jon projdzie ŭ pamiać ab im i ab 33 biełarusach, pra jakich viadoma, što jany zahinuli z 2014 pa 2022 hod u baraćbie za Ukrainu.
Z 17:00 da 17:40 na Michajłaŭskaj płoščy adbudziecca zbor udzielnikaŭ. Jany nakirujucca pa nastupnym maršrucie: Michajłaŭskaja płošča — Safijeŭskaja płošča — Teatralnaja płošča — vulica Chmialnickaha — Chryščacik — Jeŭrapiejskaja płošča — narodny miemaryjał Žyźnieŭskamu pa vulicy Hrušeŭskaha.
Z 18:40 da 20:00 projdzie ŭšanavańnie pamiaci zahinułych uradžencaŭ Biełarusi.
U vypadku pavietranaj tryvohi ŭsie ŭdzielniki buduć praviedzienyja da najbližejšaha prastornaha bambaschovišča — stancyi mietro «Majdan Niezaležnaści», paviedamlajuć arhanizatary.
