U Iranie pakarali śmierciu asudžanaha pa abvinavačańni ŭ špijanažy na karyść Brytanii
Ali-Reza Akbary, jaki maje padvojnaje hramadzianstva Vialikabrytanii i Irana, asudžany da śmiarotnaha pakarańnia ŭ Iranie pa abvinavačvańni ŭ špijanažy na karyść Vialikabrytanii, pakarany, paviedamlajuć iranskija dziaržaŭnyja ŚMI. Jon nie pryznavaŭ vinu.
Akbary zajmaŭ pasadu namieśnika ministra abarony pry prezidencie Machamadzie Chatami, jaki ŭznačalvaŭ krainu ŭ 1997—2005 hady. Pra jaho pakarańnie ŭ subotu ranicaj paviedamiła sudovaje infarmacyjnaje ahienctva Mizan. Akbary byŭ paviešany, pieradało ahienctva, nie ŭdakładniŭšy, u jaki mienavita dzień, piša Bi-bi-si.
U sieradu, 11 studzienia, aficyjnaje infarmacyjnaje ahienctva IRNA paviedamiła, što apielacyju byłoha vajskovaha čynoŭnika adchiliŭ Viarchoŭny sud krainy, pakinuŭšy ŭ sile pieršapačatkovy śmiarotny prysud.
Tady ž siamju asudžanaha paprasili pryjści ŭ turmu dla «apošniaj sustrečy». Jaho žonka kazała Piersidskaj słužbie Bi-bi-si, što Akbary pieraviali ŭ adzinočnuju kamieru.
Jaho abvinavacili ŭ «šyrokamaštabnych dziejańniach suprać unutranaj i źniešniaj biaśpieki Irana šlacham špijanažu na karyść raźviedvalnaj słužby brytanskaha ŭrada» i atrymańni za špijanaž 1805 tysiač jeŭra, 265 tysiač funtaŭ sterlinhaŭ i 50 tysiač dalaraŭ, piša ahienctva «Rejter».
U aŭdyjazapisie, jaki apynuŭsia ŭ rasparadžeńni Piersidskaj słužby Bi-bi-si, Akbary skazaŭ, što pryznaŭsia ŭ złačynstvach, jakich nie ździajśniaŭ, paśla katavańniaŭ.
Ministr zamiežnych spraŭ Vialikabrytanii Džejms Klevierli zajaviŭ u piatnicu, što Iran nie pavinien pryvodzić prysud u vykanańnie. Jon nazvaŭ śmiarotny prysud palityčna matyvavanym i zaklikaŭ da nieadkładnaha vyzvaleńnia Akbary.
«Heta palityčna matyvavany akt varvarskaha režymu, jaki całkam ihnaruje čałaviečaje žyćcio, — pisaŭ Klevierli ŭ tvitary. — Iran pavinien spynić pakarańnie brytanska-iranskaha hramadzianina Ali-Reza Akbary i nieadkładna vyzvalić jaho».
Ministerstva infarmacyi i nacyjanalnaj biaśpieki Irana ŭ svajoj zajavie nazyvała Akbary «adnym z samych važnych ahientaŭ» MI-6 i śćviardžała, što jon nibyta daŭ brytanskaj raźviedcy kaštoŭnuju infarmacyju pra Iran «metanakiravanym čynam», paviedamlała «Al-Arabija».
U čaćvier dziaržaŭnyja ŚMI pakazali videa, jakoje, ź ich słoŭ, demanstruje toje, što Akbary adyhraŭ važnuju rolu ŭ zabojstvie ŭ 2020 hodzie viadučaha iranskaha navukoŭca-jadzierščyka Machsiena Fachryzade, u jakim Iran abvinavačvaŭ Izrail.
Na videa Akbary nie pryznaŭsia ŭ datyčnaści da hetaha zabojstva, ale skazaŭ, što brytanski ahient nibyta zapytvaŭ infarmacyju ab Fachryzade (dziaržaŭnyja ŚMI ŭ Iranie časta tranślujuć «pryznańni» padazravanych u palityčna matyvavanych spravach, adznačaje Reuters).
Iranskija śpiecsłužby śćviardžajuć, što Akbary mahli schilić da supracoŭnictva padčas atrymańnia vizy ŭ brytanskim pasolstvie ŭ Tehieranie.
Ahienctva IRNA nie ŭdakładniała datu aryštu Akbary, ale Bi-bi-si stała viadoma, što jon byŭ aryštavany jašče ŭ 2019 hodzie.
Akbary byŭ blizkim paplečnikam Ali Šamchani, jaki byŭ ministram abarony ŭ administracyi Chatami i ciapier zajmaje pasadu sakratara Vyšejšaj rady nacyjanalnaj biaśpieki. Niekatoryja naziralniki dapuskajuć, što abvinavačvańni suprać Akbary mohuć być palityčna matyvavanyja supiernikami Šamchani, adznačaje «Al-Arabija».