Mahistrat «Knihaŭka»: Rada kultury zapuskaje pieršy prajekt «biełaruskaha Patreona»
Biełaruskaja rada kultury abviaščaje zbor hrošaj u padtrymku vydaviectva Andreja Januškieviča. Robicca heta pavodle kancepcyi mahistrata — supolnaści biełarusaŭ, što damaŭlajucca ciaham peŭnaha pieryjadu padtrymlivać pierśpiektyŭnyja i prabiełaruskija prajekty vyłučeńniem vyznačanaj sumy hrošaj.
Fota: staronka vydaviectva ŭ fejsbuku
Mahistrat «Knihaŭka», jak jaho nazvali stvaralniki, skiravany na adnaŭleńnie vydavieckaj dziejnaści Andreja Januškieviča. Jaho vydaviectva «Januškievič» było adnym z samych paśpiachovych u krainie, pakul jaho nie źniščyli biełaruskija ŭłady, piša mahistrat.byculture.org.
Ciapier Andrej Januškievič choča naładzić praces vypusku biełaruskich knih za miažoj. Dla hetaha treba šmat čaho: vyrašyć jurydyčnyja pytańni, naładzić łahistyku raspaŭsiudu knih, sfarmiravać novuju kamandu dy sabrać čytačoŭ, jakija ciapier znachodziacca ŭ roznych krainach. Dla hetaha Rada kultury i prapanuje padtrymać Januškieviča.
Pieryjad dziejnaści «Knihaŭki» — 6 miesiacaŭ: z 22 śniežnia pa 23 červienia. Kab stać udzielnikam mahistrata, treba padpisacca na achviaravańni pavodle adnaho z dvuch taryfaŭ i štomiesiac vydatkoŭvać abo 10, abo 20 dalaraŭ na karyść vydavieckaj spravy.
Siabra mahistrata atrymaje i nievialikija bonusy, jakija buduć zaležać ad vybranaha taryfu. Siarod mahčymych bonusaŭ: pryjarytetny dostup da novych vydańniaŭ, 10% źnižka na ŭsie knihi vydaviectva, što vyjduć ciaham mahistrata, udzieł u štomiesiačnych strymach z Andrejem Januškievičam, dzie toj budzie raskazvać pra vyniki mahistrata, ekskluziŭny padarunak ad Januškieviča i, pry ŭmovie ŭdziełu ŭ mahistracie ciaham 6 miesiacaŭ, elektronny siertyfikat udzielnika.
Što vydaviec płanuje zrabić na hetyja hrošy? Pieradusim, u płanach Andreja Januškieviča — vydać nastupnyja knihi: «Karol» Ščepana Tvardacha, «I ŭzychodzić sonca…» Ernesta Cheminhueja, novyja knihi biełaruskich aŭtaraŭ Jevy Vajtoŭskaj, Alhierda Bachareviča, Valera Hapiejeva, Alaksandra Kudryckaha. Vydaviectva taksama viartajecca da rychtavańnia pierakładaŭ sieryj pra Hary Potera Džoan Roŭlinh, «Viedźmara» Andžeja Sapkoŭskaha, «Haspadara Ledzianoha Sadu» Jarasłava Hžendoviča. Ale ž mahistrat patrebny i dla taho, kab naładzić raspaŭsiud knih i ich prodaž.
Padtrymać prajekt možna tut.
«Siońnia varta bić pa ŭsich frantach ciemrašalstva». Historyk Cimafiej Akudovič pra cieni vajny i pierafarmatavańnie krainy
Płaciš 10 dalaraŭ u miesiac — i atrymoŭvaješ kulturnuju prahramu na śviaty. Biełarus prapanuje novy padychod
Biełaruskaj niezaležnaj kultury dali 2 miljony jeŭra. Na što jany pojduć?
