Bi-bi-si: Udałosia ŭstanavić imiony 10 002 zahinułych rasijan va Ukrainie. Ź ich 400 mabilizavanych
Na asnovie adkrytych krynic Bi-bi-si ŭdałosia ŭstanavić imiony bolš za 10 tysiač rasijskich vajskoŭcaŭ, jakija zahinuli na vajnie va Ukrainie. U ich liku — bolš za 400 mabilizavanych.
Pachavańnie sałdata ŭ Buracii
Ź pieršaha dnia vajny Ruskaja słužba Bi-bi-si viadzie pajmienny śpis strat rasijskich vajskoŭcaŭ va Ukrainie sumiesna z vydańniem «Miedyjazona» i kamandaj vałancioraŭ. Na 9 śniežnia ŭdałosia paćvierdzić infarmacyju ab 10 002 zahinułych sałdatach i aficerach.
Žurnalisty abapirajucca tolki na paćvierdžanyja paviedamleńni ab hibieli, tamu sabranyja danyja nie adlustroŭvajuć realny ŭzrovień strat. Jany miarkujuć, što śpis moža ŭtrymlivać prynamsi na 40—60% mienš imionaŭ zahinułych, čym realna pachavana ŭ Rasii. Da takoj vysnovy pryjšli, vyvučyŭšy pomniki vajskoŭcam, miemaryjalnyja šyldy i abstanoŭku na mohiłkach u bolš čym 60 nasielenych punktach Rasii.
Takim čynam, pa najbolš kansiervatyŭnaj acency, straty rasijskaj armii i Rashvardyi va Ukrainie mohuć składać bolš za 20 000 čałaviek.
Ahulnyja biezzvarotnyja straty Rasii (heta značyć kolkaść tych, chto vybyŭ sa stroju pa pryčynie ranieńnia, śmierci abo prapaŭ bieź viestak) mohuć składać prynamsi 90 000 čałaviek.
Hetaja ličba atrymana na asnovie nazirańniaŭ Centra vajenna-marskoha analizu ZŠA, zhodna ź jakim na kožnaha zahinułaha rasijskaha vajennaha padčas vajny va Ukrainie prypadaje kala 3,5 paranienych. U hetuju ličbu nie ŭvachodziać tyja, chto vajavaŭ na baku Rasii ŭ składzie «narodnych milicyj» Daniecka i Łuhanska.
Hibiel mabilizavanych
Usiaho viadoma pra śmierć 430 mabilizavanych — heta na 104 čałavieki bolš, čym dva tydni tamu.
Ź ich udałosia ŭstanavić imiony 394 čałaviek, jakija zahinuli ŭ zonie bajavych dziejańniaŭ na terytoryi Ukrainy. Jašče 36 pamierli na terytoryi Rasii — čaściej za ŭsio z-za prablem z sercam, z pryčyny niaščasnych vypadkaŭ abo z-za złoŭžyvańnia ałkaholem.
Realnyja straty siarod mabilizavanych mohuć być značna bolšyja, pakolki ŭ mnohich paviedamleńniach pra sałdat, jakija zahinuli va Ukrainie pačynajučy z kastryčnika, nie pakazvajecca ich status. Z-za hetaha časam niemahčyma zrazumieć, słužyŭ mužčyna kantraktnikam, pajšoŭ na front dobraachvotnikam ci byŭ mabilizavany.
Pryčyn dla istotnych strat siarod mabilizavanych moža być niekalki. Pa vodhukach samich mabilizavanych, hałoŭnyja prablemy — heta drennaja kaardynacyja, prablemy z suviaźziu i kartami, a taksama niedastatkovaja padrychtoŭka rekrutaŭ.
Niaroŭnaść rehijonaŭ
Da zimy na pieršaje miesca pa kolkaści paćvierdžanych strat vyjšaŭ Krasnadarski kraj (428 zahinułych). Pry hetym pra śmierć 40% zahinułych z hetaha rehijona nie paviedamlałasia ŭ ŚMI i sacsietkach — ab ich hibieli ŭdałosia daviedacca, tolki vyvučyŭšy pachavańni na miascovych mohiłkach.
Na druhim miescy pa kolkaści zahinułych — Dahiestan (363 čałavieki), na trecim — Buracija (356 čałaviek). Dla paraŭnańnia: viadoma tolki pra 54 zahinułych z Maskvy, choć žychary stalicy składajuć amal 9% nasielnictva Rasii.
Kali paviarchoŭna pahladzieć na hetyja ličby, to moža skłaścisia ŭražańnie, što Rasija pasyłaje na front u asnoŭnym etničnyja mienšaści. Ale, detalna vyvučyŭšy sabranyja Bi-bi-si, Miedyjazonaj i vałanciorami źviestki, sacyjołahi pryjšli da zvarotnaj vysnovy.
Z adnaho boku, pradstaŭniki nacyjanalnych respublik jeduć na front i hinuć tam čaściej za vychadcaŭ z «ruskich» rehijonaŭ. Ź inšaha boku, u absalutnych ličbach — bolšaść zahinułych rasijskich vajskoŭcaŭ — etničnyja rasijanie.
Miarkujučy pa ŭsim, vysokaja ryzyka hibieli etničnych mienšaściaŭ — chutčej vynik niaroŭnaści pamiž rehijonami, a nie śviadomaj palityki dyskryminacyi. U mnohich kutkach Rasii, dzie nie pracujuć sacyjalnyja lifty, słužba ŭ armii pa kantrakcie źjaŭlajecca ledź ci nie adzinaj mahčymaściu atrymać stabilny zarobak.
Piłoty
Za apošnija dva tydni stała viadoma ab hibieli prynamsi dzieviaci vajennych piłotaŭ. Heta vielmi adčuvalnyja straty, pakolki vajennyja lotčyki — adzinkavyja śpiecyjalisty i elita luboj armii śvietu.
Na padrychtoŭku kožnaha bajavoha piłota sychodzić nie mienš za dziesiać hadoŭ i miljony dalaraŭ.
Praciahvajuć nieści straty i elitnyja — najbolš bajazdolnyja i padrychtavanyja — złučeńni rasijskaj armii i Rashvardyi. Z pačatku śniežnia stała viadoma pra hibiel čatyroch supracoŭnikaŭ śpiecnaza HRU, u tym liku adnaho staršaha aficera.
Strata aficeraŭ śpiecnaza moža być vielmi adčuvalnaj i ciažkavykanalnaj dla rasijskaha vojska, adznačajuć apytanyja Bi-bi-si eksperty. Na padrychtoŭku lejtenanta adpaviednaj kvalifikacyi treba prynamsi čatyry hady. A dla taho, kab uznačalić rotu, lejtenant pavinien nabracca vopytu i prajści šlach da kapitana, što zapatrabuje jašče kala čatyroch hadoŭ. Razam — nie mienš vaśmi hadoŭ padrychtoŭki, adznačajuć śpiecyjalisty.
Usiaho za dzieviać miesiacaŭ vajny śpiecnaz HRU straciŭ bolš za 250 čałaviek. Praktyčna kožny čaćviorty ź ich — aficer.
Straty, jakija niasuć atrady śpiecnaza Rashvardyi, supastaŭnyja — a ŭ niekatorych vypadkach i pieravyšajuć — sukupnyja straty hetych padraździaleńniaŭ za 10 hadoŭ vajny ŭ Čačni. Śpiecnazaŭcy stali hinuć čaściej, pakolki ich sistematyčna vykarystoŭvajuć dla vyrašeńnia nieŭłaścivych im zadač.
Naprykład, raźviedčykaŭ pryciahvajuć dla nadhladu i pravierki vulic u zachoplenych nasielenych punktach, a zamieščanych na zusim inšyja apieracyi rashvardziejcaŭ — dla ahulnavajskovych bajoŭ i abarončych dziejańniaŭ.
Śmierci kamandziraŭ
Z 10 002 ustanoŭlenych rasijskich vajskoŭcaŭ, jakija zahinuli va Ukrainie, 1 509 čałaviek, heta značyć 15%, — aficery. Siarod zahinułych — čatyry hienierały i 49 pałkoŭnikaŭ.
Zbolšaha vysoki ŭzrovień strat siarod aficeraŭ tłumačycca paśpiachovymi dziejańniami raźlikaŭ vysokadakładnych dalnabojnych sistem zachodniaha ŭzoru, jakija pastupili ŭ rasparadžeńnie armii Ukrainy. Rakiety HIMARS nieadnarazova źniščali štaby i kamandnyja punkty rasijskich vajskoŭcaŭ.
Jašče adna pryčyna — asablivaści arhanizacyi rasijskich Uzbrojenych sił. Pavodle acenki śpiecyjalistaŭ, Rasija ŭstupiła ŭ vajnu, majučy lišak vajskovaj techniki i vostry niedachop navučanaha asabistaha składu. U vyniku ŭ chodzie vajny kamandziry vymušanyja kamandavać u bai sałdatami, jak siaržanty, asabista vieści ich u ataku abo trymać ź imi abaronu zamiest taho, kab kiravać bajavymi dziejańniami praz padnačalenych.
Da dziasiataha miesiaca vajny najbolšaja kolkaść strat — 17% — prypadaje na piachotu.
Za apošnija miesiacy istotna vyrasła kolkaść strat siarod tych, kaho rasijskija dziaržaŭnyja ŚMI nazyvajuć dobraachvotnikami — ciapier ich dola składaje 12%. U bolšaści vypadkaŭ heta ludzi, jakija pa svaim žadańni padpisali karotkaterminovyja kantrakty ź Minabarony i Rashvardyjaj užo paśla pačatku vajny.
Adna z pryčyn vysokich strat siarod dobraachvotnikaŭ — niedastatkovaja padrychtoŭka. Pierad adpraŭkaj na front śpiecham źviedzienyja atrady časta prachodziać tolki 3—10 dzion padrychtoŭki.
Dola zahinułych desantnikaŭ pastupova źnižajecca, pakolki ciapier asnoŭnaja nahruzka kładziecca na padraździaleńni motastrałkoŭ (bolšaja častka mabilizavanych i dobraachvotnikaŭ ulivajecca jakraz u piachotnyja častki) i atrady PVK, u liku jakich vajujuć i źniavolenyja.
Da 9 śniežnia ŭdałosia daviedacca imiony prynamsi zahinułych 95 źniavolenych, jakija vajavali ŭ składzie rasijskich vajenizavanych padraździaleńniaŭ. Pavodle acenki fondu «Ruś» (pryznany ŭ Rasii zamiežnym ahientam), kolkaść zavierbavanych na vajnu źniavolenych pieravysiła 20 000 čałaviek.
Vynikovaja ličba strat rasijskaha boku istotna ŭzrastaje, kali ŭklučyć u śpis tych, chto vajavaŭ suprać Ukrainy ŭ składzie «narodnych milicyj» Daniecka i Łuhanska.
Na 2 śniežnia ŭłady samaabvieščanaj DNR pryznali hibiel 4 001 vajskoŭca. U samaabvieščanaj ŁNR pra straty nie paviedamlajuć, ale z adkrytych krynic vynikaje, što ich vidavočna bolš za 1 000 čałaviek.
Navat kali ŭličyć tolki hetyja źviestki, sukupnyja straty tych, chto vajuje na baku Rasii, pieravysiać 25 tysiač čałaviek zahinułymi.
Z ulikam paranienych ahulnyja straty prarasijskich sił mohuć pieravyšać 112 500 čałaviek.
Pa acency ZŠA, kali ličyć zabitych i paranienych, straty Rasii va Ukrainie pieravysili 100 tysiač čałaviek.
Hienštab Ukrainy aceńvaje straty Maskvy ŭ 93 tys. čałaviek. Ministerstva abarony Rasii apošni raz paviedamlała ab stratach 21 vieraśnia, skazaŭšy ab hibieli 5 937 čałaviek.
