Biełarusam, jakija buduć źviartacca pa vizu abo zachočuć pasialicca ŭ Litvie, zadaduć pytańni pra vajnu
Hramadzianie Biełarusi i Rasii, jakija buduć źviartacca pa nacyjanalnuju vizu abo dazvoł na žycharstva ŭ Litvie, pavinny buduć adkazać na składzienyja pytańni, adkazy buduć mieć vyrašalnaje značeńnie pry vyniasieńni vierdyktu, skazana ŭ pres-relizie Departamienta mihracyi, piša Delfi.
Kali inšaziemiec admovicca adkazvać na pytańni abo adkazvać na ŭsie pytańni, jaho zajaŭku nie buduć prymać. Taki apytalnik Departamient mihracyi moža davać i hramadzianam inšych krain.
Apytalnik źjaviŭsia paśla taho, jak ministr unutranych spraŭ Ahnie Biłatajcie ŭniesła źmieny ŭ zakony, što rehłamientujuć paradak vydačy dakumientaŭ hramadzianam inšych krain, jakija źviartajucca pa dazvoł na žycharstva ŭ Litvie. Svaje rekamiendacyi pa takim apytalniku DM padaŭ i Departamient dziaržbiaśpieki.
Apytalnik pavinny buduć zapaŭniać usie hramadzianie Biełarusi i Rasii z 18 hadoŭ, kali jany buduć źviartacca pa novyja dakumienty abo prasić padoŭžyć dazvoł na žycharstva ŭ Litvie, ci ž pa nacyjanalnuju vizu.
U apytalniku hramadzianie inšych krain pavinny buduć padać infarmacyju pra svaju adukacyju, miescy pracy, słužbu va Uzbrojenych siłach, ab biznes-suviaziach, kantaktach ź dziaržaŭnymi viedamstvami krain, jakija nie źjaŭlajucca krainami NATA i ES, taksama pavinny buduć vykłaści svaju pazicyju pa pytańni vajennaj ahresii Rasii va Ukrainie.
«Inšaziemiec, jaki choča pryjechać u Litvu i žyć tut, musić być ščyrym i adkrytym. Jon pavinien pakazać, što hatovy supracoŭničać z prymajučaj jaho krainaj», — padkreśliła kiraŭnik DM Evielina Hudzinskajcie.
Pavodle jaje słoŭ, heta budzie dadatkovy filtr biaśpieki, jaki dazvolić bolš apieratyŭna vyjavić zamiežnikaŭ, jakija ŭ minułym mieli suviazi ź niedemakratyčnymi režymami i mohuć ujaŭlać pahrozu nacbiaśpiecy Litvy.
Kali hramadzianin Rasii ci Biełarusi, jaki choča atrymać vizu abo dazvoł na žycharstva ŭ Litvie, admovicca zapaŭniać apytalnik ci nie adkaža na ŭsie pytańni, to śpiecyjalisty DM mohuć nie prymać jaho zajaŭku. Kali taki čałaviek padaść iłžyvyja źviestki abo schavaje niejkuju značnuju infarmacyju, to heta stanie padstavaj dla skasavańnia dazvołu na žycharstva abo vizy.
