Guardian: U administracyi Bajdena pačynajuć padtrymlivać ideju «Niurnbierha» dla Rasii
Brytanskaja hazieta Guardian piša, što klučavyja fihury ŭ Administracyi prezidenta ZŠA Džo Bajdena pačynajuć padtrymlivać ideju stvareńnia śpiecyjalnaha trybunała, jaki vyvučyć vajennyja złačynstvy, učynienyja paśla rasijskaha ŭvarvańnia va Ukrainu, i rolu rasijskaha kiraŭnictva ŭ hetaj vajnie.
Vydańnie adznačaje, što pieršapačatkova ŭ ZŠA skieptyčna stavilisia da takoj idei, ale značnyja namahańni ŭkrainskaha lidara Uładzimira Zialenskaha, jaki aktyŭna łabiruje stvareńnie trybunała, prymusili mnohich klučavych hulcoŭ u atačeńni Bajdena pierahledzieć svaju pazicyju.
Pasoł ZŠA ŭ asablivych daručeńniach u halinie hłabalnaha kryminalnaha pravasudździa Bet van Šaak zajaviła na hetym tydni: «Heta toje, što vielmi chvaluje prezidenta Zialenskaha. Heta toje, čaho choča Ukraina, i ja dumaju, što heta budzie mieć vialikaje značeńnie».
Raniej jana kazała, što Mižnarodny kryminalny sud maje jurysdykcyju nad prezidentam Rasii Uładzimiram Pucinym, a samo MUS prystupiła da rasśledavańnia vajennych złačynstvaŭ, učynienych na terytoryi Ukrainy.
Ale ŭ kiraŭnictvie Ukrainy ličać, što MUS zmoža pieraśledvać tolki kankretnych vajennych złačyncaŭ, ale nie rasijskaje kiraŭnictva, i nastojvajuć na stvareńni asobnaha trybunała.
Pa danych Guardian, dypłamaty ŭ ciapierašni momant abmiarkoŭvajuć, jakim moh by być taki trybunał, i razhladajuć dva varyjanty. U pieršym heta budzie sud, stvorany sumiesna Ukrainaj i AAN. U druhim — trybunał budzie stvaracca Ukrainaj razam ź ES abo Radaj Jeŭropy pry padtrymcy AAN.
Pa śćviardžeńni haziety, u AAN užo źjaviŭsia prajekt rezalucyi ab stvareńni takoha trybunała.
Praciŭniki trybunała ličać, što jaho źjaŭleńnie źnizić status MUS, a taksama — što heta moža adšturchnuć rasijskaje kiraŭnictva ad pieramovaŭ ab spynieńni bajavych dziejańniaŭ. Jany taksama adznačajuć, što kiraŭniki dziaržavy i ministry zamiežnych spraŭ u adpaviednaści ź mižnarodnym pravam mohuć mieć imunitet ad pieraśledu ŭ nacyjanalnych sudach.
Na dany momant ideju stvareńnia trybunała padtrymlivajuć Francyja, Niderłandy i krainy Bałtyi. Pazicyja ZŠA i Vialikabrytanii pa hetym pytańni da niadaŭniaha času była strymanaj.
Na minułym tydni pieršaja łedzi Ukrainy Alena Zialenskaja adstojvała ideju stvareńnia trybunała, vystupajučy pierad deputatami brytanskaha parłamienta.
