Jaki los čakaje «Majontak Padarosk», dyrektar jakoha znachodzicca ŭ SIZA
Dyrektara majontka «Padarosk» Juryja Mielaškieviča zatrymali ŭ kancy kastryčnika. Razam z kamandaj jany adnaŭlali staražytnuju šlachieckuju siadzibu apošnija 9 hod. Što ciapier z samim majontkam?
Siadziba ŭ Padarosku. Fota: facebook.com/majontak.padarosk
Kiraŭnika Juryja Mielaškieviča i finansavaha dyrektara PTUP «Majontak Padarosk» Dźmitryja Karabača zatrymali pa padazreńni ŭ niaspłacie padatkaŭ (art. 243 KK). Taksama ich padazrajuć u niaspłacie strachavych unioskaŭ z zarobkaŭ rabotnikaŭ amal na 400 000 rubloŭ. Na staroncy pradpryjemstva paviedamili, što heta poŭnaja chłuśnia.
«Heta sprava absalutna palityčna matyvavanaja, — kaža krynica, znajomaja ź situacyjaj. — Da padziej 2020-ha «Majontak Padarosk» pracavaŭ dobra, adnosiny z uładami byli narmalnyja, pretenzij, u tym liku ekanamičnych, nie ŭźnikała. Z 2020-ha stała zrazumieła, što kali-niebudź los represij napatkaje i «Majontak Padarosk».
Inicyjatyva adnaŭlaje siadzibu Čačotaŭ-Bochvicaŭ, u 2013 hodzie majontak za 118 tysiač dalaraŭ vykupiŭ rasijski biznesmien biełaruskaha pachodžańnia Pavieł Padkarytaŭ.
«Da 2020-ha hoda šmat čaho było zroblena pa restaŭracyi, terytoryja z majontkam vialikaja, tam čatyry pabudovy. Apošnija dva hady inviestary čakali, dumali, ci varta ŭkładać hrošy paśla takich padziej.
Byŭ uparadkavany park, budynki, zroblena brama, daroha. Za kompleksam sačyli jak za historyka-kulturnaj kaštoŭnaściu. Układziena tudy było niedzie pad miljon dalaraŭ», — raskazali «Našaj Nivie».
Daražej za ŭsio abyšłasia sistema kanalizacyi i filtracyi, a taksama ziemlanyja raboty, źviazanyja ź jaje ŭstaloŭkaj.
Brama. Fota: facebook.com/majontak.padarosk
Inicyjatyva źbirałasia stvarać muziej biełaruskaj šlachty, časovaja ekspazicyja ŭžo pracavała. U majontku dla naviedvańnia było adkryta 14 pakojaŭ.
Ciapier rachunki pradpryjemstva zabłakavanyja, majomaść apisanaja. Majontak pa sutnaści začynieny, dahladać niama kamu.
«Miarkujučy pa anałahičnych spravach u Biełarusi, a ich dziasiatki, kaniečnie, vystaŭleńnie ekanamičnych abvinavačvańniaŭ robicca dla taho, kab likvidavać firmu. Vystavić joj takuju vialikuju sumu, jakuju jana nie zmoža pahasić, i za košt hetaha adabrać «Majontak Padarosk», — ličyć krynica, znajomaja ź situacyjaj.
Pry pierachodzie siadziby pad dziaržaŭnaje kryło naŭrad ci varta čakać jaje adnaŭleńnia.
«Kali režym pratrymajecca jašče niekalki hadoŭ, to znoŭ kompleks budzie ŭ drennym stanie, bo asabliva ciapier va ŭładaŭ niama hrošaj na raźvićcio turyzmu, padtrymańnie siadziby ŭ dobrym stanie».
Čytajcie taksama:
Kiraŭnik i finansavy dyrektar «Majontka Padarosk» zastajucca pad vartaj
Zatrymali troch supracoŭnikaŭ pradpryjemstva «Majontak Padarosk»
Samy papularny majontak u Litvie admoviŭsia prymać turystaŭ z Rasii
