Mera Charkava aštrafavali za vykarystańnie na słužbie ruskaj movy
Mera Charkava Ihara Cierachava aštrafavali na 3 400 hryŭniaŭ (92 dalary) za zvaroty da žycharoŭ horada na ruskaj movie, a nie na dziaržaŭnaj ukrainskaj. Pra pakarańnie charkaŭskaha mera paviedamiŭ ukrainski ŭpaŭnavažany pa abaronie dziaržaŭnaj movy Taras Kremień.
Ihar Cierachaŭ
Moŭny ombudsmien vynies pastanovu ab nakładańni štrafu ŭ pamiery 3400 hryŭniaŭ.
U dakumiencie skazana, što Cierachaŭ u zvarotach da žycharoŭ Charkava ŭ efiry ahulnanacyjanalnaha telemarafonu vykarystaŭ niedziaržaŭnuju movu, čym parušyŭ č. 1 art. 12 zakona ab movie.
Taksama Cierachavu vyniesiena papiaredžańnie za parušeńnie č. 6 art. 27 zakona, jakaja praduhledžvaje, što aficyjnyja staronki mera ŭ fejsbuku i telehramie pavinny ŭtrymlivać publikacyi na dziaržaŭnaj movie.
Moŭny ombudsmien taksama nahadaŭ, što letaś užo byli ŭstanoŭlenyja fakty vykarystańnia deputatami Charkaŭskaj haradskoj rady, u tym liku Cierachavym, niedziaržaŭnaj movy padčas ažyćciaŭleńnia svaich paŭnamoctvaŭ. Tady byli składzienyja akty i pratakoły ab parušeńniach, a taksama ŭ haradskuju radu Charkava nieadnarazova nakiroŭvalisia listy z tłumačeńniami normaŭ zakona.
Zakon pra dziaržaŭnuju movu Ukrainy, na jaki abapirajecca moŭny ombudsmien, byŭ pryniaty ŭ krasaviku 2019 hoda, a 16 lipienia jon nabyŭ siłu. Tym nie mienš, dahetul zdarajecca, što niekatoryja dziaržaŭnyja čynoŭniki, asabliva ŭ rehijonach ź pieravahaj ruskamoŭnaha nasielnictva, vykonvajuć jaho nie vielmi stroha.
