Kardynalna pierapisali zakon ab rekłamie, bolš budzie ałkaholu i azartnych hulniaŭ
Načalnik upraŭleńnia abarony pravoŭ spažyŭcoŭ i kantrolu za rekłamaj Ministerstva antymanapolnaha rehulavańnia i handlu Biełarusi Ina Haŭrylčyk u intervju vydaniu «Smartpres» raskazała pra značnyja źmieny, jakija miarkujecca ŭvieści ŭ rekłamnaj śfiery. Hałoŭnaje — dazvolać bolš šyroka rekłamavać ałkaholnyja napoi i hulniavyja ŭstanovy.
Fota ilustracyjnaje
Čynoŭnica paviedamiła, što prajekt novaha zakona ab rekłamie ŭžo praktyčna hatovy:
«Raspracavany prajekt zakona, jakim płanujecca ŭnieści źmieny ŭ dziejučy zakon ab rekłamie. (…) Ciapier jon užo ŭniesieny va ŭrad, prachodzić jurydyčnuju ekśpiertyzu ŭ Nacyjanalnym centry zakanadaŭstva i pravavych daśledavańniaŭ. I budziem spadziavacca, što ŭ najbližejšy čas budzie ŭniesieny ŭ parłamient dla razhladu», — skazała Haŭrylčyk.
Najbolš istotnaja prajektavanaja źmiena — buduć adkarektavanyja pravaadnosiny pa raźmiaščeńni rekłamy biezałkaholnaha piva i biezałkaholnych piŭnych napojaŭ.
Pavodle ciapierašniaha zakanadaŭstva, biezałkaholnaje piva padpadaje pad usie zabarony na rekłamu, praduhledžanyja dla zvyčajnaha. Paśla ž pryniaćcia zakona «možna budzie rekłamavać biezałkaholnyja piva i napoi na telebačańni, na radyjo ŭ luby čas, a taksama na srodkach vonkavaj rekłamy».
Zakonaprajekt taksama praduhledžvaje pavieličeńnie času tranślacyi rekłamy hulniavych ustanoŭ i azartnych hulniaŭ na telebačańni i radyjo — na adnu hadzinu. Ciapier heta možna rabić z 22:00, a płanujecca — z 21:00. Anałahičnaja situacyja — dla rekłamy piva i słabaałkaholnych napojaŭ.
Jašče adno novaŭviadzieńnie — mahčymaść rekłamy ałkaholnych napojaŭ na telebačańni i na radyjo. Dazvolić jaje miarkujecca z 22:00 da 7:00.
Vyhladaje, što heta praciah zapuščanaj jašče ŭ pačatku hetaha hoda kampanii pa zabieśpiačeńni dziaržaŭnaj prapahandy dachodami ad rekłamnych hrošaj. Viasnoj Łukašenka padpisaŭ ukaz ab raźvićci ŚMI, pavodle jakoha ŭstanoŭleny zbor za raźmiaščeńnie vonkavaj rekłamy i rekłamy na transparcie ŭ pamiery 10%. U inšych vypadkach płacicca 20% ad koštu pasłuh pa raspaŭsiudžvańni rekłamy. Zbor musić vypłačvacca rekłamadaŭcami i nakiroŭvacca na padtrymku dziaržaŭnych srodkaŭ masavaj infarmacyi.
Čytajcie taksama:
Łukašenka padpisaŭ ukaz ab raźvićci ŚMI. Dziaržaŭnyja miedyja buduć ciapier karmicca sa zboru ad rekłamadaŭcaŭ
