Premjer Polščy: «Ruski śviet» — heta rak, jaki pahražaje ŭsiamu śvietu
«Ruski śviet» — heta rak, jaki pahražaje nie tolki bolšaści rasijskaha hramadstva, ale i ŭsioj Jeŭropie, skazaŭ premjer Polščy Matevuš Maraviecki ŭ videa, adrasavanym udzielnikam kanfierencyi Płatformy jeŭrapiejskaj pamiaci i sumleńnia. Heta mierapryjemstva, jakoje prachodzić ciapier u Prazie i pryśviečanaje siarod inšaha rasijskaj dezynfarmacyi, paviedamlaje polskaje infarmacyjnaje ahienctva PAP.
Matevuš Maraviecki. Fota: PAP
Daśledčyki i palityki dyskutujuć u Prazie pra historyju hibrydnych pahroz i pra toje, jak viedy pra minułyja časy mohuć dapamahčy abaranicca pierad rasijskaj prapahandaj.
Matevuš Maraviecki adznačyŭ, što Rasija pravodzić hibrydnuju vajnu, meta jakoj — nie tolki rasijskaje nasielnictva, ale taksama i asiarodki, jakija ŭpłyvajuć na hramadskuju dumku va ŭsim śviecie.
«Historyja — adzin z klučavych instrumientaŭ, jakimi Rasija karystajecca šmat hadoŭ. My nie možam ihnaravać ci pabłažliva stavicca da hetaj pahrozy.
Adsutnaść našaj jeŭrapiejskaj reakcyi na rasijskuju prapahandu moža zaachvocić Rasiju da dalejšaha staŭleńnia pad pytańnie dobra zadakumientavanych i viadomych histaryčnych faktaŭ», — padkreśliŭ polski premjer.
Maraviecki źviarnuŭ uvahu, što ŭ 2021 hodzie Rasija pryniała zakon, jaki zabaraniaje stavić znak roŭnaści pamiž dziejańniami SSSR i niamieckaha Treciaha Rejcha, što pryvodzić da zamoŭčvańnia faktaŭ, jakija nie pasujuć da rasijskich naratyvaŭ pra Druhuju suśvietnuju vajnu. Padobnuju funkcyju vykonvajuć mierkavańni, jakija sankcyjanujuć tak zvanuju katynskuju chłuśniu, dadaŭ jon.
Maraviecki adznačyŭ, što pucinskaja ideałohija «ruskaha śvietu» zamianiła papularnuju ŭ XX stahodździ kamunistyčnuju. «Heta nie varjactva, a pradumanaja stratehija, jakaja ŭžo adčyniła bramu da zabojstva ludziej», — padkreśliŭ jon.
Płatforma jeŭrapiejskaj pamiaci i sumleńnia — mižnarodnaja niedziaržaŭnaja arhanizacyja. Jana abjadnoŭvaje muziei, archivy i ŭstanovy pa zachavańni pamiaci z roznych krain. Ciapier Płatforma maje 68 členaŭ z 23 krain.
