Jehier uratavaŭ viaskoŭcaŭ u Mazyrskim rajonie ad ahresiŭnaha vaŭka
Jehier dapamoh žycharam vioski ŭ Mazyrskim rajonie pazbavicca ad ahresiŭnaha vaŭka, jaki napadaŭ nie tolki na chatnich žyvioł, ale i pakusaŭ čałavieka. Padrabiaznaści historyi pryvodzić Minlashas.
Fota ilustracyjnaje
Nočču z 16 na 17 listapada supracoŭniku Mazyrskaha vopytnaha lashasa Piatru Dojniaku patelefanavali žychary vioski Hlinica i paskardzilisia, što na sabak napaŭ voŭk. Jehier žyvie ŭ vioscy pa susiedstvie, tamu prybyŭ na miesca zdareńnia vielmi chutka.
Viaskoŭcy pakazali jamu pakusanych sabak, ale drapiežnik užo źnik. Supracoŭnik lashasa adpraviŭsia jaho šukać, dla hetaha pačaŭ abjazdžać viosku. Pačuŭšy brech sabak, jehier zrazumieŭ, što na darozie byŭ voŭk. Tady jon vychapiŭ z mašyny viły i zakałoŭ dzikuju žyviolinu.
Pa słovach miascovych žycharoŭ, drapiežnik užo nie raz prychodziŭ u viosku. Nie tak daŭno jon pakusaŭ mužčynu, jaki sprabavaŭ jaho adbić ad sabaki. Paciarpiełaha zabrała chutkaja.
Rabotniki vieterynarnaj słužby Mazyrskaha rajona praviarajuć vaŭka na šalenstva, a miesca jaho hibieli ŭžo pradezinfikavali.
Paru hadoŭ tamu, jak nahadvaje Minlashas, padobnaja situacyja zdaryłasia i ŭ Staŭbcoŭskim rajonie. Pa słovach śpiecyjalistaŭ, kali voŭk vyjšaŭ da ludziej i prajaŭlaje ahresiju, z 90-pracentnaj upeŭnienaściu možna śćviardžać, što ŭ jaho šalenstva.
