Brytanskaja raźviedka patłumačyła, čym vyhadny Hieničask dla Rasii paśla zdačy Chiersona
Vajennaja raźviedka Ministerstva abarony Vialikabrytanii ŭ svajoj štodzionnaj ranišniaj zvodcy aceńvaje jak vyhadnaje z vajennaha punktu hledžańnia stanovišča novaha centra akupavanaj častki Chiersonskaj vobłaści.
Raniej akupacyjnyja ŭłady abviaścili pra časovy pierajezd u Hieničask — horad na bierazie Utlukskaha limana ŭ Azoŭskim mory prykładna za 40 kiłamietraŭ ad krymskaha pamiežnaha punkta Džankoj, administracyjny centr Hieničaskaha rajona Chiersonskaj vobłaści. I choć akupacyjnyja ŭłady abvierhli zajavy ab pieranosie abłasnoha centra ŭ Hieničask, dziejničać jany płanujuć mienavita adtul.
Rasija, vierahodna, taksama pieradysłacyruje padraździaleńni vajennaha kiravańnia ŭ rajon Kachoŭki, ličać u brytanskaj raźviedcy.
Vybar hetaha rajona ŭ jakaści kamandnaha vuzła pakazvaje na pryjarytety rasijskich vajskoŭcaŭ, jakija ŭmacoŭvajuć svaju abaronu na poŭdni Ukrainy. U jaho dobryja pazicyi dla kaardynacyi dziejańniaŭ suprać patencyjnaha ŭkrainskaha nastupu — jak z boku Chiersona, heta značyć paŭnočnaha zachadu, tak i z boku Mielitopala na paŭnočnym uschodzie, jaki kantralujecca Rasijaj, a taksama dla atrymańnia padmacavańniaŭ z Kryma.
Ale pierš za ŭsio, Hieničask u ciapierašni čas znachodzicca pa-za dasiažnaściu ŭkrainskich artyleryjskich sistem, jakija nanieśli vialikija straty rasijskim palavym kamandnym punktam u Chiersonskaj vobłaści.
