Ukrainskija vojski ŭvajšli ŭ łuhanskuju Makiejeŭku
Frantavyja błohiery paviedamlajuć pra ciažkuju dla rasijan situacyju pad Kramiannoj.
«Učora ŭ chodzie ciažkich bajoŭ našym vojskam pryjšłosia pakinuć siało Makiejeŭka i adyści», — piša rasijski prapahandyst WarGonzo.
Raniej ukrainskija vojski zaniali Nieŭskaje na poŭdzień ad Makiejeŭki i Karmazinaŭku na poŭnač ad jaje. U hetym rajonie na zachadzie Łuhanskaj vobłaści iduć zaciatyja bai. Pamiž vyzvaleńniem Nieŭskaha z Karmazinaŭkaj i susiedniaj ź imi Makiejeŭki prajšoŭ 21 dzień.
Da vajny ŭ hetaj Makiejeŭcy žyło kala 800 čałaviek. Nie treba błytać jaje ź vialikim horadam Makiejeŭka pad Danieckam.
«Siońnia praciŭnik praciahvaje cisnuć z hetaha kirunku ŭ bok trasy Kramiannaja—Svatava, — piša WarGonzo. — Taksama USU praz terytoryju Sierabranskaha laśnictva, na poŭdzień ad Kramiannoj, padychodziać da ŭskrain horada i viaduć abstreły z boku lesu, pramacvajučy našu abaronu. Takim čynam praciŭnik sprabuje akružyć Kramiannuju z dvuch kirunkaŭ. Jak i mierkavałasia, praciŭnik viadzie na našym učastku frontu aktyŭnyja nastupalnyja dziejańni. Vidavočna, padciahnuŭšy novyja reziervy».
Paśla vyzvaleńnia Limana ŭ pačatku kastryčnika pieradavyja ŭkrainskija vojski zamacavalisia ŭ Torskim, Ciarnach i zaniali vakolicy Kramiannoj — horada, raźmieščanaha za 35 kiłamietraŭ na ŭschod ad Limana. Rasijskija vojski vystraili novuju liniju abarony na zachad ad linii Kramiannaja—Svatava, pa rečcy Žarabiec.
«Paŭstaje pytańnie ab utrymańni Kramiannoj — adnaho z klučavych punktaŭ, jakija zabiaśpiečvajuć paŭnočny fłanh abarony Lisičanska. Kramiannuju zdavać nielha ni ŭ jakim razie», — zaklikaŭ pałkoŭnik Hirkin.
Kramiannaja — horad, u jakim da vajny žyło 18 tysiač čałaviek. Ën staić na levym bierazie Sievierskaha Danca adrazu nad dalinaj raki. Ad jaho 30 km da Lisičanska. Kramiannuju rasijanie zaniali 18 krasavika.
Nahadajem, što 1 kastryčnika rasijskaje Minabarony pryznała stratu Limana. «U suviazi sa stvareńniem pahrozy akružeńnia sajuznyja vojski byli adviedzienyja z nasielenaha punkta Čyrvony Liman na bolš vyhadnyja rubiažy», — havaryłasia ŭ zajavie Maskvy.
Paŭnočniej ukraincy stvaryli šmatlikija płacdarmy na levym bierazie raki Askoł i nastupajuć ad Łazavoj, Kupianska dy Dvurečnaj.
Svatava — rajcentr na poŭnačy Łuhanskaj vobłaści, da vajny ŭ im žyło 16 tysiač čałaviek. Rasijskija vojski akupavali horad 6 sakavika, na 11-y dzień vajny.
Vyzvaleńnie Svatava abo Kramiannoj mieła b jak stratehičnyja, tak i maralnyja nastupstvy. Heta byŭ by pieršy vyzvaleny rajcentr Łuhanskaj vobłaści, jakaja na siońnia amal całkam kantralujecca rasijskimi vojskami.
U cełym situacyja na łuhanskim kirunku pakazvaje, što inicyjatyvu zachoŭvaje ŭkrainskaja armija.
