Ekśpiert: Apieratyŭnaj paŭzy nie budzie. Paśla Chiersona ŭkrainskija vojski pojduć na Maryupal, Mielitopal i Krym
Pra nastupnyja vierahodnyja napramki ataki USU kanału «Možiem objaśniť» raspavioŭ vajenny ekśpiert Michaił Samuś.
Michaił Samuś. Skryn videa
«Reč u tym, što ŭkrainskaje vojska ciapier atrymlivaje mahčymaść poŭnaha ahniavoha kantrolu levaha bieraha. Tyja ž samyja HIMARS ciapier apynajucca na adlehłaści 80 km ad podstupaŭ da Kryma. I čyhunačnyja vuzły, jakija znachodziacca ŭ Krymie, buduć pad ahniavym kantrolem», — adznačaje ekśpiert.
Jak ličyć surazmoŭca «MO», Uładzimir Pucin daŭno choča zamarozić vajenny kanflikt, tamu rasijskaje kiraŭnictva ŭsio čaściej havoryć pra pieramovy. Ale dla ŭkrainskaj armii ŭ ciapierašni momant niama nijakaha sensu spyniać kontrnastupleńnie.
«Nie budzie apieratyŭnaj paŭzy. Pakolki front budzie zafiksavany pa Dniapry, tam USU niama sensu trymać vialikija siły. Hetyja siły možna budzie pieranapravić na inšyja kirunki. Ja dumaju, što heta buduć Maryupal i Mielitopal. Mielitopal byŭ hałoŭnym łahistyčnym chabam, praź jaki vojski išli z terytoryi Rasii. I Rasii treba rychtavać linii abarony», — upeŭnieny Samuś.
Adnačasova zachoŭvajecca vysokaja vierahodnaść abstrełaŭ Chiersona ź levaha bieraha Dniapra. «Nakolki vialikija siły tam budzie trymać Rasija, kab źniščyć Chierson, — zaležyć ad padziej na froncie», — miarkuje Samuś.
