Stała viadoma, što skazaŭ Stramavusaŭ u svaim apošnim paście
Namieśnik kiraŭnika akupacyjnaj administracyi Chiersonščyny Kirył Stramavusaŭ, pra śmierć jakoha — nibyta ŭ DTP — stała viadoma siońnia, pierad adpraŭleńniem u svaju apošniuju darohu zapisaŭ čarhovaje (jak akazałasia, apošniaje) videa i napisaŭ post u telehramie.
U svaim apošnim paście vysokapastaŭleny kałabarant nasupierak vidavočnym faktam praciahvaŭ śćviardžać, što «na dadzienym etapie situacyja znachodzicca pad poŭnym kantrolem rasijskich vajskoŭcaŭ». Usiudy, pavodle jaho słoŭ, ukraincy namahajucca nastupać i prarvać liniju abarony, ale biespaśpiachova. Choć nibyta pry ich dziejańniach zadziejničanyja «zamiežnyja najomniki».
Nadziei na śvietłuju budučyniu ŭ Stramavusava byli źviazanyja z Respublikanskaj partyjaj ZŠA: «Kalektyŭny Bajden zakančvaje svaju mahiju, i chutka va ŭkranacystaŭ skončycca finansavańnie z-za poŭnaha fijaska demakrataŭ na vybarach u ZŠA».
Samomu jamu pravieryć adekvatnaść svaich prahnozaŭ užo nie sudžana.