«Supakojciesia! Nijakaj pravakacyi». U Breście novy bar nazvali ŭ honar Puškina
U Breście źbirajucca adkryć hastrabar «Puškin'». Jaho prezientujuć jak miesca, dzie «moh by adpačyvać sučasny vałacuha, jaki, jak i Puškin, lubić śvieckuju ŭtulnaść i haračyja tusoŭki da ranicy».
Čamu ŭ honar Puškina?
«Supakojciesia! Nijakaj pravakacyi, — zajavili ŭ hastrabary na heta pytańnie.
Prosta bar pobač z Puškinskim univiersitetam, pobač z Puškinskaj vulicaj, prosta tak vyrašyli ŭłaśniki: mahčyma, heta ich ulubiony paet».
Kancepcyju miesca ŭłaśniki apisali ŭ instahramie:
«Hastrabar «Puškin'» — heta miesca, u jakim moh by adpačyvać sučasny vałacuha, jon ža anfan terybl. Jak i Puškin, jon lubić i śvieckuju ŭtulnaść, i haračyja tusoŭki da ranicy ź nievialikim napyleńniem brudnych dumak u apjanionaj hałavie».
Fota: instahram-akaŭnt bara
U mieniu anansujucca kłasičnyja i ŭnikalnyja kaktejli z aŭtarskim počyrkam, bahaty vybar napojaŭ z usich kancoŭ śvietu. Ź ježy — «stravy jeŭrapiejskaj kuchni z revieransam u bok Francyi».
Hastrabar budzie mieć dźvie častki — bar i łaundž. Pieršaje — dla tusovak, druhoje — dla spakojnaha baŭleńnia času.
Adkryćcio čakajecca ŭ listapadzie.
Ustanova z takoj ža nazvaj jość i ŭ Rasii. Adnak adzin sa znaŭcaŭ restarannaha biznesu vykazaŭ sumnieŭ adnosna suviazi bresckaha hastrabara i maskoŭskaha fiešeniebielnaha restarana. Na jaho dumku, uładalniki hastrabara nazvali ŭstanovu mienavita tak, bo ŭ Breście «zasille Puškinych».
«Takuju zaviadzionku zakłali jašče za savieckim časam, kali horad navadnili savieckija adstaŭniki, a biełaruski Brest napaŭniali rasijskaj kulturnaj sutnaściu. Ničoha nie źmianiłasia, i Puškinych nie stanovicca mieniej, a ciapier jašče dadasca rasijskaje «jać». Heta nibyta prykmieta niejkaj cyvilizacyjnaści, najvyšejšaj kulturnaści», — vykazvajecca surazmoŭca.
Žurnalist i brestaŭčanin Ihar Kulej zaŭvažaje: «Kožny ŭładalnik biznesu maje prava nazvać svaju spravu luboj nazvaj, što nie piarečyć dziaržaŭnym zakonam ci normam marali.
U Brest pryjazdžaje vielmi šmat turystaŭ z Rasii, i žadańnie padhulać im zrazumiełaje. Mahčyma, pabačyŭšy nazvu, jakuju jany paličać «rodnaj», svajoj, jany bolš achvotna skarystajucca pasłuhami takoha biznesu».
Ź inšaha boku, praciahvaje surazmoŭca, jaho zasmučaje toj fakt, što ŭ Breście zakryvajucca biznesy z nazvami blizkimi i važnymi dla horada.
«Paśla pratestaŭ 2020 hoda ŭ nas zakryli kramu «Kniaź Vitaŭt». Vitaŭt maje značna bolšaje dačynieńnie da historyi našaha horada, čym Puškin. Pry im Bieraście, druhoje ŭ Vialikim Kniastvie paśla Vilni, atrymała mahdeburskaje prava. Razam ź Jahajłam Vitaŭt rychtavaŭ u Bresckim zamku płan, prasłaviŭšy našych prodkaŭ Hrunvaldskaj bitvaj», — nahadvaje jon.
Pavodle jaho, jość i dobryja sihnały.
«Šmat hadoŭ papularnaja linija małočnych praduktaŭ bieraściejskaj fabryki «Savuškaŭ pradukt» «Brest-litoŭskaja» mieła na ŭpakoŭkach nadpis «Znatnyj produkt'» i datu 1795 — hod treciaha padziełu Rečy Paspalitaj, kali Brest uvajšoŭ u skład Rasijskaj impieryi. I voś niekalki hadoŭ tamu i hod, i nadpis źnikli. A ŭnizie banki śmiatany navat źjaviłasia vyjava vioski z kaściołam, charakternaja dla našaha rehijona», — padsumoŭvaje žurnalist Ihar Kulej.
Viktar Marcinovič: Kraina na litaru «Ѣ»
Rasijskich turystaŭ buduć vazić pa Biełarusi ciepłachodam
Kiraŭnik «DNR» pryjechaŭ u Brest i napisaŭ, što nastaŭ čas vyzvalać «ruskija harady, zasnavanyja ruskimi ludźmi»
