U «Płana Dalesa» źjaviŭsia kankurent. BT vydaje fejkavyja cytaty pra Biełaruś i «łancuhovych šalonych sabak»
U efiry BT vyjšła čarhovaja sieryja prapahandysckaj prahramy «Zrazumiełaja palityka», u jakoj aŭtary parazvažali pra raspad Juhasłavii. Nie abyšłosia biez fejkavych cytat.
«Historyja z bambardziroŭkami Juhasłavii, aryštam i sudom nad prezidentam krainy Słabadanam Miłošavičam stała jarkaj demanstracyjaj palityki Zachadu ŭ dačynieńni da dziaržaŭ, jakija nie zhodnyja z kaštoŭnaściami, što im naviazvajuć», — havorać aŭtary filma.
Prapahandysty śćviardžajuć, što ŭ 2006 hodzie, niezadoŭha da śmierci, palityk daŭ apošniaje intervju, u jakim źviarnuŭsia da ŭsich «ruskamoŭnych narodaŭ».
«Hety zvarot zvyšaktualny i siońnia. A voś tady byłoha prezidenta razadranaj krainy nichto nie pasłuchaŭ», — narakaje prapahandyst.
«Ruskija! Ja ciapier źviartajusia da ŭsich ruskich (žycharoŭ Ukrainy i Biełarusi na Bałkanach taksama ličać ruskimi). Pahladzicie na nas i zapomnicie — z vami zrobiać toje ž samaje, kali vy raźjadnajeciesia i daście słabinu. Zachad — łancuhovy šalony sabaka — učepicca vam u horła. Braty, pamiatajcie pra los Juhasłavii! Nie dajcie abyścisia z vami hetak ža!» — nibyta skazaŭ Miłošavič.
Skrynšot BT.
Ale nichto i nie moh tady «pasłuchać» Miłošaviča, bo padobnych słoŭ jon prosta nie havaryŭ.
Słabadan Miłošavič — pieršy prezident Sierbii i pieradapošni prezident Juhasłavii, abvinavačany mižnarodnym trybunałam pa spravach byłoj Juhasłavii ŭ ździajśnieńni vajennych złačynstvaŭ i hienacydu padčas juhasłaŭskich vojnaŭ. U 2006 hodzie palityk pamior u turmie, nie dažyŭšy da zakančeńnia suda.
Nibyta papiaredžańnie Miłošaviča ruskim vielmi papularnaje ŭ ruskamoŭnym internecie — u sacsietkach, błohach, sajtach. Zvyčajna hetuju cytatu prypisvajuć apošniamu intervju Miłošaviča, ale znajści hetaje intervju ŭ internecie niemahčyma. Miarkujučy pa ŭsim, upieršyniu vykazvańnie prypisaŭ Miłošaviču ŭkrainski žurnalist Alaksandr Varonin u svaim tekście za 2012 hod.
Choć da situacyi ŭ Juhasłavii ŭ kancy 1990-ch hadoŭ i sudovaha pracesu suprać Miłošaviča była prykavanaja ŭvaha i zamiežnych žurnalistaŭ, «zvarot da ruskich» nie pryvodzić nivodnaje bujnoje miedyja. Bolš za toje, jano naohuł nie zhadvajecca ŭ pošukavaj sistemie Google pry zapycie pa klučavych słovach na anhlijskaj movie. Cytata huhlicca tolki na ruskaj movie — na rasijskich prapahandysckich i čarnasocienskich resursach. Tych resurach, jakija razvažajuć pra nieisnujučy «płan Dalesa» i «Pratakoły sijonskich mudracoŭ».
Takim čynam, vykazvańnie, što prypisvajecca byłomu prezidentu Juhasłavii, stała viadoma tolki praź niekalki hadoŭ paśla jaho śmierci.
Na asnovie fejkavych cytat prapahandysty robiać fejkavyja i manipulatyŭnyja vysnovy pra raspad Juhasłavii.
«Ciapier navat amierykanskija analityki pryznajuć, što kožny krok u razvale Juhasłavii — dakładny scenar. Za nitački tuzali prosta z-za akijana. A što zaraz adbyvajecca z Ukrainaj, vy bačycie sami…», — havorać prapahandysty.
Nasamreč raspad Juhasłavii staŭ vynikam vyklučna ŭnutranych pracesaŭ u hetaj krainie: ekanamičnaha kryzisu, mižetničnych kanfliktaŭ, rostu nacyjanalizmu i nacyjanalnaj samaśviadomaści, a taksama supracivu sierbaŭ, jakija vystupali suprać raspadu krainy pa administracyjnych miežach (jakija nie supadali ź miežami etničnymi i moŭnymi). Umiašańnie zachodnich krain u kryzis i bambardziroŭki NATA Juhasłavii stali nastupstvam hetaha kryzisu, a nie jahonaj pryčynaj.
Zachodnija krainy na heta pajšli, kab spynić etničnyja čystki i vajennyja złačynstvy ŭ rehijonie.
