Adkidy ź Biełaruskaj AES buduć zachoŭvać u Biełarusi, schovišča pabudujuć u najbližejšaje dziesiacihodździe
Siarod varyjantaŭ miesca dla schovišča radyjeaktyŭnych adkidaŭ ź Biełaruskaj AES — zona kala samoj elektrastancyi, a taksama terytoryi, jakija paciarpieli ŭ vyniku avaryi na Čarnobylskaj AES, paviedamiŭ načalnik upraŭleńnia pa abychodžańni z radyjeaktyŭnymi adkidami Dziaržatamnahladu Dźmitryj Paŭłaŭ.
Fota ilustracyjnaje
Pavodle słoŭ čynoŭnika, dla kožnaha typu adkidaŭ u schoviščy buduć arhanizavanyja asobnyja moduli. Budavać schovišča płanujecca paetapna.
«Praz 10 hadoŭ budzie nieabchodna raźmiaścić adkidy, jakija ŭtvarajucca na BiełAES, na punkcie zachavańnia. Tamu pieršuju čarhu hetaha abjekta płanujecca stvaryć i ŭvieści ŭ ekspłuatacyju mienavita praz 10 hadoŭ. U płanach prypavierchnievaje zachoŭvańnie, a nie hłybinnaje», — skazaŭ Paŭłaŭ.
Jon adznačyŭ, što na terytoryi Biełarusi buduć zachavanyja radyjeaktyŭnyja adkidy, jakija ŭtvarylisia tut ža.
«Heta ahulny pryncyp MAHATE, heta prapisana i ŭ našych zakonach, — skazaŭ pieršy namieśnik načalnika Dziaržatamnahladu Leanid Dziedul. — Radyjeaktyŭnyja adkidy — heta rečyvy, jakija źmiaščajuć radyjenuklidy, jakija ŭžo nie płanujecca ŭ dalejšym vykarystoŭvać. A adpracavanaje jadziernaje paliva padlahaje pierapracoŭcy. U adpaviednaści z pahadnieńniem z Rasijaj, pierapracoŭka budzie pravodzicca na jaje terytoryi, a ŭžo astatnija pradukty pierapracoŭki my zachavajem u Biełarusi».
