«Mabilizujcie ŭsich». Łukašenka zaklikaŭ adpravić u pole studentaŭ, pracoŭnych, dziaržaŭnych słužačych, a taksama školnikaŭ
Treba pryciahvać dla dapamohi ahraryjam usich, u tym liku i navučencaŭ, skazaŭ Łukašenka padčas kadravych pryznačeńniaŭ kiraŭnikoŭ rajvykankamaŭ, pieradaje BIEŁTA.
Łukašenka raspavioŭ pra nieabchodnaść jakasna i ŭ termin zaviaršyć uboračnuju kampaniju, u pryvatnaści, pa ŭborcy bulby, cukrovych burakoŭ, kukuruzy, lonu.
«Mabilizujcie ŭsich», — zapatrabavaŭ jon.
Łukašenka padkreśliŭ, što heta tyčycca nie tolki rabotnikaŭ ahrapramysłovych pradpryjemstvaŭ. Pry nieabchodnaści možna i treba pryciahvać da ŭborki ŭradžaju navučencaŭ. Łukašenka aburyŭsia tym, što ŭ niekatorych ustanovach adukacyi zabaroniena pryciahvać školnikaŭ da takich vidaŭ rabot: «Bolšaj dzikaści ja ŭjavić nie mahu. My niejak sprabujem vychavać našych školnikaŭ, dziaciej. Na čym vy budziecie [vychoŭvać]? Bałbatnioj? Bałbatnioj nie vychavaješ».
Łukašenka miarkuje, što vopyt raniejšych hadoŭ, kali padletki i moładź dapamahali sielhaspradpryjemstvam ubirać uradžaj, byŭ stanoŭčy, heta sadziejničała zhurtavańniu kalektyvu, pryvučała da pracy. «Kali čałaviek pojdzie 5-6 hadzin papracuje — i baćkam u radaść, i dziciaci dobraja fizičnaja padrychtoŭka. My ŭsie, i vy (ja — dakładna) pracavali. Nie pracavali, a ŭkałvali, i daj boh jak.
Tamu mabilizujcie studentaŭ, pracoŭnych, dziaržaŭnych słužačych, inšych ludziej dla taho, kab dapamahčy nam prybrać heta ŭsio. Tamu što hrošy prystojnyja možam zarabić. Nie ciapier, dyk pa viaśnie».
