Abjadnany pierachodny kabinet Biełarusi nie pryznaje «referendumaŭ» ab dałučeńni častki ŭkrainskich terytoryj da Rasii
Abjadnany pierachodny kabiniet Biełarusi asudziŭ praviadzieńnie na akupavanych Rasijaj terytoryjach Ukrainy refierendumaŭ ab dałučeńni da Rasijskaj Fiederacyi. Z adpaviednaj zajavaj vystupiŭ pradstaŭnik Kabinieta pa zamiežnych spravach Valeryj Kavaleŭski.
«U suviazi s pačatkam praviadzieńnia tak zvanych refierendumaŭ u spravie dałučeńnia da Rasii časova akupavanych ukrainskich terytoryj u Danieckaj, Łuhanskaj, Chiersonskaj i Zaparožskaj abłaściach majem zajavić nastupnaje, — adznačyŭ Kavaleŭski. —
Abjadnany pierachodny kabiniet Biełarusi nie pryznaje ni inicyjatyvu, ni praces, ni vyniki niezakonnych refierendumaŭ. Tak zvanyja refierendumy abvieščanyja i pravodziacca akupacyjnymi administracyjami, padkantrolnymi Rasii i pryznačanymi z boku Rasii».
Pavodle słoŭ Kavaleŭskaha, «refierendumy» nie majuć lehitymnaści na terytoryi Ukrainy, pravodziacca «pad siłavym kantrolem Uzbrojenych sił Rasii z vykarystańniem pramoha cisku na miascovaje nasielnictva».
Refierendumy ŭ akupavanych abłaściach Ukrainy «pravodziacca z parušeńniem mižnarodnych normaŭ, standartaŭ i ŭ kantekście hvałtu, nieprazrysta, a značyć nie mohuć słužyć padstavaj dla samavyznačeńnia».
«Vykarystańnie ich u takich metach budzie ličycca taksama i pahrozaj biaśpiecy Biełarusi. Zajavy i dziejańni lubych pradstaŭnikoŭ orhanaŭ dziaržaŭnaj ułady Biełarusi, nakiravanyja na pryznańnie vynikaŭ refierendumaŭ, budzie rasceńvacca jak dziaržaŭnaje złačynstva, jak dziejańni, jakija škodziać nacyjanalnaj biaśpiecy Respubliki Biełaruś», — dadaŭ Kavaleŭski.
Pry hetym jon padkreśliŭ, što Abjadnany pierachodny kabiniet Biełarusi
«ličyć złačynnymi lubyja zamachi na terytaryjalnuju cełasnaść Ukrainy, uklučajučy anieksiju Krymu ŭ 2014 hodzie i niezakonny zachop Rasijaj častki terytoryj Danieckaj i Łuhanskaj abłaściej u pieryjad paśla 2014 hoda».
Kabiniet «pryznaje biezumoŭnaje prava Ukrainy na deakupacyju nazvanych terytoryj lubymi dastupnymi srodkami, uklučajučy palityčnyja, vajennyja i inšyja miery, na spraviadlivuju adpłatu ŭ adnosinach da asob, vinavatych u arhanizacyi złačynnych refierendumaŭ i ich nastupstvach, i budzie akazvać u hetym usiemahčymuju padtrymku Ukrainie».
