Kačanava vystupiła za viartańnie savieckaj praktyki školnych charaktarystyk dla abituryjentaŭ VNU
Padčas narady ŭ staršyni Savieta Respubliki Natalli Kačanavaj «sienatarka» Maryna Iljina raspaviała, što na «dyjałohavych placoŭkach» nibyta «idzie šmat abmierkavańniaŭ nakont charaktarystyk».
«Kali budzie niejkaja ŭniviersalnaja forma charaktarystyki, jakuju kožnaja ŭstanova adukacyi dakładna zapoŭnić i budzie razumieć svaju adkaznaść — tady heta charaktarystyka zmoža spracavać na dziaržaŭnuju karyść. My ŭbačym aktyŭnych rabiat, jakija biaruć udzieł va ŭsich mierapryjemstvach. Na moj pohlad, heta taksama moža być adnym sa składnikaŭ kampanientaŭ usioj pryjomnaj kampanii», — skazała Maryna Iljina.
Natalla Kačanava stanoŭča acaniła prapanovu. Jana zajaviła, što charaktarystyka sapraŭdy patrebnaja.
«Kryteryi pavinny być, bo nie tolki vučoba charaktaryzuje dzicia. Ale kali ty daŭ charaktarystyku, to niasieš za heta adkaznaść», — skazała staršynia Savieta Respubliki.
U saviecki čas piśmovyja charaktarystyki byli abaviazkovyja dla abituryjentaŭ VNU i dla ŭładkavańnia na pracu, a taksama dla inšaha prasoŭvańnia pa sacyjalnaj leśvicy. U charaktarystykach zvyčajna pisali pra ideałahičnuju addanaść čałavieka savieckaj sistemie i asabisty ŭdzieł u budaŭnictvie kamunizmu. Z časam jany vyradzilisia ŭ farmalnaść.
