ISW: Ukraincy prasunulisia ŭ rajonie Bałaklei na 20 km
Amierykanski instytut vyvučeńnia vajny (ISW) u štodzionnaj zvodcy piša, što ŭkrainskaja armija, vidavočna, skarystałasia pierakidkaj rasijskich sił na poŭdzień, u Chiersonskuju vobłaść, kab udaryć u rajonie Bałaklei.
Fota: AP
«Rasijskija krynicy śćviardžajuć, što rasijskija vojski pačali pierakidku padmacavańnia ŭ hety rajon, kab adbić nastup ukraincaŭ, a rasijskaja hrupoŭka ŭ hetym rajonie, chutčej za ŭsio, była asłablenaja praź pierakidvańnie sił na zachop pakinutaj terytoryi Danieckaj vobłaści i na padtrymku paŭdniovaha kirunku», — pišuć analityki instytuta.
Pavodle acenki ISW, zasnavanaj na paviedamleńniach mnohich krynic, ukraincy ŭ rajonie Bałaklei zmahli prasunucca prykładna na 20 km i advajavać terytoryju prykładna ŭ 400 kv. km.
«Hieałakavanyja zdymki pakazvajuć, što ŭkrainskija častki prasunulisia pa šašy T2210 ad Bałaklei i Viarboŭki praź Jakavienkava, Vołachaŭ Jar (na skryžavańni T2210 i E40) u bok Šaŭčenkava (na skryžavańni T2210 i N26)», — piša ISW i adznačaje, što, zhodna z razvahami rasijskich vajskovych błohieraŭ, ukraincy nastupajuć taksama i na paŭdniovym uschodzie ad Bałaklei, imknučysia pierarezać šlachi zabieśpiačeńnia rasijskich vojskaŭ i stvaryć umovy dla dalejšaha nastupleńnia na ŭschodzie, na važny transpartny vuzieł Kupiansk, a taksama na Izium, jaki raźmieščany na paŭdniovy ŭschod ad Bałaklei.
Karta «Bi-bi-si»
