Azierbajdžan chacieŭ by padvoić pastaŭki hazu ŭ Jeŭrasajuz
Azierbajdžan maje namier padvoić pastaŭki hazu ŭ Jeŭrasajuz, pavialičyŭšy prapusknuju zdolnaść hazapravoda TANAP, jaki prachodzić praz Hruziju i Turcyju. Pra heta zajaviŭ prezident Azierbajdžana Ilcham Alijeŭ na forumie ŭ Italii.
«Prapusknaja zdolnaść TANAP (Transanatalijskaha trubapravoda) składaje 16 młrd kub.m. my płanujem pavialičyć jaho da 32 młrd kub. m. prapusknaja zdolnaść TAR (Transadryjatyčnaha trubapravoda) składaje 10 miljardaŭ kubamietraŭ, u ciapierašni čas jon pracuje na poŭnuju mahutnaść i nam treba pavialičyć jaho mahutnaść chacia b da 20 miljardaŭ kubamietraŭ», — skazaŭ jon.
Alijeŭ paćvierdziŭ damoŭlenaści, dasiahnutyja z kiraŭnictvam Jeŭrakamisii, ab padvajeńni pastavak. Ź jahonych słoŭ, paśla napadu Rasii na Ukrainu da Baku źviarnulisia bolš za dziesiać krain z zapytami na pavieličeńnie pastavak paliva. Jon dadaŭ, što dadatkovyja abjomy ŭžo atrymali Turcyja, Hruzija, Italija, Bałharyja.
