U Baranavičach zatrymali kiraŭnictva avijacyjnaha zavoda. Vierahodna, pa padazreńni ŭ karupcyi
U Baranavičach u siaredzinie červienia zatrymali kiraŭnictva 558-ha avijacyjnaha ramontnaha zavoda. Pra heta piša «Zierkało» na padstavie śviedčańniaŭ, atrymanych u rozny čas ad nie źviazanych pamiž saboj krynic. Paśla infarmacyju paćvierdzili i supracoŭniki pradpryjemstva.
Źleva Pavieł Pinihin. Fota: hazieta «Naš kraj». Sprava: Viačasłaŭ Ivančukoŭ. Fota z sacyjalnych sietak
Pa słovach surazmoŭcaŭ «Zierkała», kiraŭnictva avijacyjnaha zavoda ŭ Baranavičach zatrymali jašče ŭ siaredzinie červienia. Dakładnuju pryčynu jany nie viedajuć, ale miarkujuć, što chutčej za ŭsio abvinavačvańnie źviazana z karupcyjaj i uchileńniem ad vypłaty padatkaŭ.
«U ich byli vielizarnyja sumy. Mahčyma, heta nie źviazana z palitykaj, ale ciaham niekalki miesiacaŭ da zatrymańnia kadebešniki vyklikali na dopyty, prasłuchoŭvali telefony, šukali, chto moža dasyłaŭ fota samalotaŭ, jakija lotali ŭ bok Ukrainy. A jak vynik — niejki čałaviek siadzić. Viadoma, što dapytvali navat tych, chto zvolniŭsia raniej», — raspaviała «Zierkału» krynica, znajomaja ź situacyjaj.
Jak udakładnili niekalki supracoŭnikaŭ pradpryjemstva, zatrymanyja były dyrektar zavoda Pavieł Pinihin i jahony namieśnik Viačasłaŭ Ivančuk. Akramia ich, vierahodna, pa spravie prachodziać i zatrymanyja jašče jak minimum troje supracoŭnikaŭ zavoda.
Viadoma, što Paŭłu Pinihinu 60 hadoŭ, jon naradziŭsia ŭ Baranavičach. Skončyŭ Charkaŭskaje vyšejšaje vajskovaje avijacyjna-inžyniernaje vučylišča. Bolš za 30 hadoŭ pryśviaciŭ Baranavickamu zavodu: tudy mužčyna pryjšoŭ jašče ŭ 1991 hodzie.
Za hety čas Pinihin atrymaŭ jašče adnu adukacyju, ale ŭžo ŭ halinie mižnarodnych adnosin, skončyŭšy Akademiju kiravańnia pry prezidencie. Pastupova padymaŭsia pa karjernaj leśvicy i ŭ 2015 hodzie ŭznačaliŭ avijacyjna-ramontny zavod u Baranavičach.
Na sajcie zavoda imia Pinihina ŭžo niama. Tam paznačana, što pradpryjemstva ŭznačalvaje Andrej Tučyn, vykanaŭca abaviazkaŭ dyrektara.
Pra Viačasłava Ivančukova viadoma mienš. Jamu 58 hadoŭ, jon žanaty. Ivančukoŭ taksama skončyŭ Charkaŭskaje avijacyjna-inžyniernaje vučylišča, vypuściŭsia ŭ 1986 hodzie.
U jakim statusie ciapier znachodziacca hetyja ludzi i jakija abvinavačvańni im vystavili, nieviadoma. Infarmacyi pra raźvićcio kryminalnaj spravy ŭ supracoŭnikaŭ niama.
