Za žnivień pa «pratesnych» kryminalnych spravach asudžana nie mienš za 98 čałaviek
Pravaabarončy centr «Viasna» na praciahu žniŭnia fiksavaŭ tendencyju na pavieličeńnie kryminalnaha pieraśledu hramadzian pa palityčnych matyvach. PC «Viasna» viadoma pra nie mienš jak 98 hramadzian, asudžanych u žniŭni pa palityčnych matyvach.
Ilustracyjnaje fota
Suadnosiny viadomych pravaabaroncam žančyn i mužčyn, asudžanych za žnivień u kryminalnym paradku, składaje 19.39% i 80.61% adpaviedna.
Z ahulnaj kolkaści asudžanych u žniŭni hramadzian, źviestki pra jakich udałosia sabrać PC «Viasna», pavodle dyfamacyjnych artykułaŭ, na vyklučeńni jakich z Kryminalnaha kodeksa doŭhi čas nastojvaje pravaabarončaja supolnaść, asudžany 51% hramadzian. Pa artykułach ab padrychtoŭcy hrupavych dziejańniaŭ, jakija hruba parušajuć hramadski paradak abo aktyŭnym udziele ŭ ich, asudžana 27% hramadzian.
Pravaabaroncy zafiksavali, što ŭ žniŭni sudovaja sistema ŭ pieravažnaj bolšaści vypadkaŭ praciahvała ŭžyvać da fihurantaŭ «pratesnych» kryminalnych spraŭ pakarańni, źviazanyja z pazbaŭleńniem i abmiežavańniem voli. Sumarna za žnivień pa viadomych PC «Viasna» spravach sudy vynieśli:
— 223 hady i 10 miesiacaŭ pazbaŭleńnia voli ŭ dačynieńni da 63 čałaviek;
— 29hadoŭ abmiežavańnia voli z nakiravańniem u papraŭčuju ŭstanovu adkrytaha typu («chimija») u dačynieńni da 11 čałaviek;
— 62 hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija») u dačynieńni da 24 čałaviek;
— 2800 bazavych vieličyń štrafu na sumu 89600 rubloŭ u jakaści dadatkovaha pakarańnia dla 11 čałaviek razam z pazbaŭleńniem (dla 10 asudžanych) i abmiežavańniem voli (dla adnaho čałavieka);
— 5 hadoŭ zabarony na zaniaćcie pasad, źviazanych z vykanańniem arhanizacyjna-rasparadčych abaviazkaŭ, u jakaści dadatkovaha pakarańnia dla 1 čałavieka razam z pazbaŭleńniem voli.
Pavodle viadomych pravaabaroncam prysudaŭ pa «pratesnych» kryminalnych spravach u žniŭni sudy ŭžyvali pakarańnie, źviazanaje z pazbaŭleńniem voli, u 64.28% vypadkaŭ. Abmiežavańnie voli z nakiravańniem u PUAT («chimija») sudy vykarystoŭvali ŭ jakaści pakarańnia ŭ 11.23% vypadkaŭ. Abmiežavańnie voli biez nakiravańnia ŭ PUAT («chatniaja chimija») užyvałasia ŭ 24.49% vypadkach asudžeńnia hramadzian.
Takim čynam, pakarańnie pa palityčna matyvavanych kryminalnych spravach, źviazanaje z pazbaŭleńniem voli, jaje abmiežavańniem u vyhladzie «chimii» i «chatniaj chimii», sudy ŭžyvali ŭ 100% vypadkaŭ asudžeńnia fihurantaŭ «pratesnych» spraŭ u žniŭni.