U Partuhalii ŭ sadzie znajšli najbujniejšy ŭ Jeŭropie škilet dynazaŭra
U horadzie Pombał, Partuhalija, vyjavili astanki brachijazaŭra — pradstaŭnika najbujniejšaha vidu z usich dynazaŭraŭ i naziemnych žyvioł, jakija kali‑niebudź isnavali na ziamli. Daśledčyki nazyvajuć jaho samym vialikim škiletam dynazaŭra, znojdzienym u Jeŭropie.
Škilet byŭ znojdzieny ŭ sadzie za žyłym domam. Jaho ŭładalnik zaŭvažyŭ frahmienty akamianiełaściaŭ jašče ŭ 2017 hodzie i źviazaŭsia z daśledčykami ź Lisabonskaha ŭniviersiteta. Tady ž i pačalisia raskopki.
«Niezvyčajna znajści ŭsie rebry takoj žyvioły, nie kažučy ŭžo pra toje, što jany zachavali svajo pieršapačatkovaje anatamičnaje stanovišča», — skazała supracoŭnica Lisabonskaha ŭniviersiteta Elizabet Małafaja.
Daśledčyki spadziavajucca, što pry dalejšych raskopkach im udasca vyjavić bolš častak taho ž dynazaŭra. Miarkujučy pa pamiery škileta, paleantołahi vykazali zdahadku, što jon byŭ 12 mietraŭ u vyšyniu i 25 mietraŭ u daŭžyniu.
Małafaja taksama adznačyła, što hety dynazaŭr žyŭ prykładna 145 młn hadoŭ tamu. Pavodle jaje słoŭ, hetaje adkryćcio źjaŭlajecca vielmi važnym dla dalejšaha vyvučeńnia Jurskaha pieryjadu ŭ cełym i staražytnaj faŭny Pireniejskaha paŭvostrava ŭ pryvatnaści.
